उम्मेदवारी फिर्ताको समय बुधबारसम्म, कोषाध्यक्ष र सदस्यका एक एक उम्मेद्वार पछि हटे
काठमाडौं : नेपाल वैदेशिक रोजगार व्यवसायी संघका उम्मेद्वारहरूलाई आफ्नो उम्मेद्वारी फिर्ता लिन बुधबार बिहान ११ बजेसम्मको समय दिइएको छ । संघ कार्यसमितिको आग्रहमा उम्मेद्वारी फिर्ताको समय एक दिन थप भएको निर्वाचन समितिले जनाएको छ ।
निर्वाचन समितिले सोमबार दर्ता भएका उम्मेद्वारहरुलाई मंगलबार २ बजेसम्म उम्मेद्वारी फिर्ताको समय दिएको थियोे । तर अध्यक्षलगायत पदाधिकारीमा उम्मेद्वारी दिएका कुनै व्यवसायीले आफ्नो उम्मेद्वारी फिर्ता नलिएपछि संघ कार्यसमितिको आग्रहमा निर्वाचन समितिले उम्मेद्वारी फिर्ता लिने समय बुधबार ११ बजेसम्मका लागि थप गरेको हो ।
१७ सदस्यीय कार्यसमितिमा प्रथम तथा द्वितीय उपाध्यक्ष र महासचिव पदमा एक जनाको मात्र उम्मेद्वारी दर्ता भएको कारणले निर्विरोध भएको छ । आगामी पुस ३० गते हुने संघ कार्यसमितिका १७ सदस्यको निर्वाचनका लागि सोमबार ३० जना व्यवसायीको उम्मेद्वारी दर्ता भएको छ ।
प्रथम उपाध्यक्षमा प्रगतिशील वैदेशिक रोजगार व्यवायी मञ्चद्वारा प्रस्तावित फ्युचर स्टार म्यानपावर प्रा.लि.का सञ्चालक हरि बहादुर पाण्डे क्षेत्री, द्वितीय उपाध्यक्षमा वैदेशिक रोजगार व्यवसायी गणतान्त्रिक मञ्चद्वारा प्रस्तावित हेराल्ड इन्टरनेशनल प्रा.लि.का सञ्चालक प्रमेश्वर अधिकारी र महासचिवमा एकीकृत वैदेशिक रोजगार व्यवसायी संगठनका महासचिव इम्प्लोइमेन्ट लिंक प्रा.लि.का सञ्चालक मधुकर रिजाल निर्विरोध निर्वाचित हुने भएका छन् ।
यसअघि राजनीतिक दल निकट वैदेशिक रोजगार व्यवसायीका पाँच संस्थाबीच संघको आगामी निर्वाचन निर्विरोध नेतृत्व चयन गर्ने सहमति भएको थियोे । तर उम्मेद्वारी दर्ता त्यस विपरीत परेपछि मंगलबार दिनभर सहमतिको प्रयास भएपनि सहमति हुन सकेको छैन ।
नेपाल लोकतान्त्रिक वैदेशिक रोजगार व्यवसायी एसोसिएसन र नेपाल गणतन्त्रान्त्रिक वैदेशिक रोजगार व्यववायी निकट व्यवसायीबाट सहमति भन्दा धेरै उम्मेद्वारी परेको छ ।
अध्यक्ष पदमा गुरुङ म्यानेजमेन्ट ओभरसिज प्रा.लि.का सञ्चालक भुवन सिंह गुरुङ र गणतान्त्रिक मञ्चका पूर्व अध्यक्ष रोज ओभरसिज प्रा.लि. का सञ्चालक राम प्रसाद भान्तनाको उम्मेद्वारी परेको छ ।
दुबै उम्मेद्वारले आफ्नो पक्षमा लविङ गरिरहेका छन् । अध्यक्षका उम्मेद्वार भान्तनाले उमेदवारी दर्ता भएपछि उम्मेद्वारबीच सहमति गर्नुपर्नेमा राजनीतिक दल निकट संस्थालाई भागबन्डा गरेर पद बाँडफाँड गर्दा संघमा राजनीतिमा सक्रिय चासो नहुने व्यवसायीको अपनत्व नहुने खतरा बढ्ने भन्दै भागबन्डा गर्नु अनुचित भएको दाबी गरे ।
एसोसिएसनका तर्फबाट परेका उम्मेद्वारहरूलाई यथावत राखेर आफुलाई उम्मेद्वारी फिर्ताका लागि दबाब दिइएको भन्दै उनले एसोसिएसनले आफ्नोतर्फको समस्या पहिले समाधान गर्नुपर्ने मध्यान्हलाई बताए ।
तृतीय उपाध्यक्ष ओभरसिज इम्प्लोइमेन्ट प्रा.लि.का सञ्चालक अख्तर हुसैन र संघका कार्यसमिति सदस्य डाइनामिक स्टाफिङ सोलुसनका सञ्चालक कर्ण राज कटुवालको उमेदवारी दर्ता भएको छ । मंगलबार साँझसम्म दुवै उमेदवार कायमै छन् ।
सचिवमा एसोसिएसनका पूर्वअध्यक्ष बाबा ह्युमनका सञ्चालक प्रज्ञान न्यौपाने र गुगल ओभरसिजका केशवराज न्यौपाने दुबैको उम्मेद्वारी कायमै रहेको छ । दुबै उम्मेद्वारबीच एकआपसमा छलफल भइरहेको बताइएको छ । कोषाध्यक्षमा नौकरी नेपालका सञ्चालक तथा एसोसिएसनका वर्तमान अध्यक्ष नरेन्द्र प्रसाद ढकाल र संघकी वर्तमान कोषाध्यक्ष सि.एस.टि सिजन सर्भिसकी सञ्चालिका इन्दिरा गुरुङको उम्मेद्वारी दर्ता भएको छ । गुरूङले उम्मेदवारी फिर्ता लिएको बताइएको छ ।
कार्यसिमित सदस्यहरुमा एकीकृत संगठनका कन्फिडेन्ट म्यानपावरका सञ्चालक अनिल बोगटी र सुर्खेत ओभरसिजका गणेश कुँवर, आयुष ओभसिजका कामेश्वर साह (राहुल), गणतान्त्रिक मञ्चका इम्प्लोइमेन्ट ह्युमन रिर्सोसमा सञ्चालक केदारनाथ अधिकारी, उज्यालो ओभरसिजका चन्द्र बहादुर लिम्बु, प्रगतिशील मञ्चका तर्फबाट एसिया लिंक सर्भिसेजका मिलन कट्टेल, सल्मा एचआर शोलुशनका सोम बहादुर तामाङको उम्मेद्वारी दर्ता भएको छ । एसोसिएसनका तर्फबाट मोहम्द जुनैद (खोजी रिक्रुटमेन्ट), जंग बहादुर इजम (एलन ओमर्सिज), राजेन्द्र अधिकारी (जेजे ह्युमन), हर्क बहादु लिम्बु (इसिएस इम्प्लोइमेन्ट), कैलाश पाठक (सिल्भर कर्नर), प्रेम राज लावती (एडभान्स रिक्रुटमेन्ट), प्रकाश बोहरा (मार्स म्यानपावर), नगेन्द्र प्रसाद पोखरेल (नबिन) (पुकार इन्टरनेसनल), बिक्रम श्रेष्ठ (शुभहारती म्यानपावर), लक्ष्मण पौडेल (त्रिवेणी ओभरसिज), बिजय कुमार कार्की (इम्पायर इन्टरनेसनल), ऋषिराम कडेल (आर बी ओभरसिज)को उम्मेद्वारी परेको छ ।
त्यसमध्ये इजमले उम्मेदवारी फिर्ता लिएका छन् । सदस्यमा उम्मेदवारी दर्ता गराएका पोखरेल, लिम्बू, श्रेष्ठ र जुनैद एसोसिएसनका आधिकारिक उम्मेद्वार हुन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies