अर्घाखाँची : लुम्बिनी प्रदेशका मुख्यमन्त्री चेतनारायण आचार्यले मन्त्रालयमा जाँदा दौरा सुरुवाल ढाकाटोपी नेपाली पोसाक अनिवार्य लगाउन मन्त्रीहरुलाई निर्देशन दिएका छन् ।
मुख्यमन्त्री बनेपछि बिना विभागिय मन्त्रीहरुलाई निर्देशन दिँदै मुख्मन्त्री आचार्यले प्रदेश राजधानी छोड्दा अनिवार्य मुख्यमन्त्रीसँग समन्वय गर्न निर्देशन दिएका एक मन्त्रीले मध्यान्हलाई जानकारी गराए ।
लुम्बिनी प्रदेशमा मुख्यमन्त्री आचार्य सहित कांग्रेसका ४ र एमालेका ४ जनालाई मन्त्री बनाएपनि अहिलेसम्म जिम्मेवारी तोकिएको छैन । कांग्रेस–एमालेबीच मन्त्रालय कसले कुन लिने भन्ने बारे निर्णय हुन नसक्दा अहिलेसम्म मन्त्रीहरु बिना विभागिय भएका हुन् । मन्त्री आचार्यले भौतिक प्रगतिको प्रतिशत मात्रै हिसाब गरेर नबस्न पनि मन्त्रीहरुलाई निर्देशन दिएका छन् ।
मन्त्री, मुख्य मन्त्रीहरुलाई बधाइ दिन आउने आगन्तुकहरुलाई खादा, टीका, माला लिएर मन्त्रालयमा नआउन भन्दै मुख्यमन्त्री आचार्यले सूचना समेत जारी गरेका छन् ।
भौतिक र वित्तीय प्रगतिमा मात्रै केन्द्रित नहुन भन्दै कागजी प्रगतिभन्दा पनि जनताले स्पष्ट सरकार भएको महसुस हुने गरी काम गर्नु अहिलेको सरकारको आवश्यकता भएको उनले बताए ।
आचार्यले भने,‘हामीले बुझ्नुपर्ने कुरा प्रतिशतको काममा अल्झिने होइन् । विभागिय जिम्मेवारी लिएपछि कर्मचारीहरुलाई पनि त्यतातिर पनि ध्यान दिने गरी काम गराउनुपर्छ ।’
आचार्यले उत्पादनसँग जोडेर कार्यक्रमहरू सञ्चालन गर्न र उत्पादनमुखी कार्यक्रम निर्माण गर्ने गरी काम गर्नुपर्ने बताए । त्यसका लागि आवश्यक विज्ञहरूको व्यवस्थापन गर्न समेत उनले निर्देशन दिए । प्रदेशलाई आर्थिक समृद्धितर्फ लैजाने र नागरिकलाई रोजगारीमा जोडने मुख्य योजना सरकारको हुनुपर्ने भन्दै त्यसतर्फ नै केन्द्रित सरकार रहनुपर्ने उनको भनाइ थियो ।
स्थानीय उत्पादनहरूलाई बजारीकरण गरी स्थानीय स्तरमा रहेका जनताको जीवनतर परिवर्तन गर्न सकिने गरी काम गर्न मुख्यमन्त्री आचार्यले मन्त्रीलाई आग्रह गरेका थिए । लुम्बिनी प्रदेशमा उत्पादन भएका विभिन्न सामग्रीलाई राष्ट्रिय तथा अन्तर्राष्ट्रिय बजारसम्म पु¥याउने गरी योजना बनाउनुपर्ने उनले बताए ।
