रुकुम पश्चिम : रुकुम पश्चिमको आठबिसकोट नगरपालिका–३ खदीमा स्थानीय तहको निर्वाचन नजिकिँदै जाँदा चुनावी गतिविधि बढ्दै गएको छ । विभिन्न राजनीतिक दलहरू आफ्ना कार्यक्रम, विचार र रणनीतिका साथ मतदातामाझ पुगिरहेका छन् । 

स्थानीय स्तरमा कतिपय राजनीतिक बहसहरू जातीय तथा भौगोलिक पहिचानसँग सम्बन्धित विषयहरूमा केन्द्रित हुँदै गएको चर्चा सुनिन थालेको छ । यस विषयलाई लिएर सामाजिक सद्भाव कायम रहोस् भन्ने चिन्ता पनि व्यक्त भइरहेको छ । सरोकारवालाहरूका अनुसार राजनीतिक प्रतिस्पर्धा विचार र नीतिको आधारमा हुनु लोकतान्त्रिक अभ्यासका लागि सकारात्मक मानिन्छ ।

यसै सन्दर्भमा प्रगतिशील धारका केही राजनीतिक समूहहरूले समाजका विविध जाति र भूगोलको पहिचानलाई समेटेर राजनीतिक बहस अगाडि बढाउनुपर्ने धारणा सार्वजनिक गरेका छन् ।  उनीहरूका अनुसार समावेशी छलफल र प्रतिनिधित्वले समाजलाई थप सशक्त बनाउने विश्वास लिइएको छ ।

यता नेपाली कम्युनिस्ट पार्टीले भने निर्वाचन प्रक्रियामा सबै समुदायलाई सम्मानजनक व्यवहार र आपसी सहकार्यका साथ अघि बढ्ने नीति लिएको बताएको छ । पार्टीका स्थानीय प्रतिनिधिहरूले जात, भूगोल वा पहिचानका आधारमा विभाजन नगरी सबैलाई मिलाएर चुनाव जित्ने दाबी गरेका छन् ।

स्थानीय बासिन्दा र बुद्धिजीवी वर्गले निर्वाचन शान्तिपूर्ण, मर्यादित र आपसी समझदारीका साथ सम्पन्न होस् भन्ने अपेक्षा व्यक्त गरेका छन् । उनीहरूको भनाइअनुसार चुनावी प्रतिस्पर्धा सामाजिक सद्भाव कायम राख्दै विकास र समृद्धिका एजेन्डामा केन्द्रित हुन आवश्यक छ । यस क्षेत्रमा नेपाली कम्युनिस्ट पार्टीको बाहुल्यता रहेको पनि उल्लेख गरिएको छ ।