काठमाडौँ : क्यानडाको राष्ट्रिय वायुसेवा कम्पनी एयर क्यानडाका पूर्व पाइलट जियाफ्री वाललाई नक्कली लाइसेन्सका आधारमा १७ वर्षसम्म व्यावसायिक उडान भरेको आरोपमा प्रहरीले पक्राउ गरेको छ ।

ओन्टारियोको पिल क्षेत्रीय प्रहरीले मंगलबार दिएको जानकारीअनुसार वाललाई चार महिना लामो अनुसन्धानपछि ठगी र अन्य विभिन्न आरोपमा पक्राउ गरी कानुनी कारबाही अगाडि बढाइएको हो ।

क्षेत्रीय प्रहरीका डेपुटी चीफ निक मिलिनोविचका अनुसार आरोपी वालमाथि ५ हजार डलरभन्दा बढीको धोखाधडी, सार्वजनिक उपद्रव नक्कली कागजातको प्रयोग र किर्ते प्रमाण चिह्न राखेको लगायतका विभिन्न गम्भीर मुद्दा दर्ता गरिएको छ ।

क्यानडाको उड्डयन क्षेत्रको नियामक निकाय ट्रान्सपोर्ट क्यानडाको नियमित जाँचका क्रममा उनको कागजातमा कैफियत भेटिएपछि यो घटना बाहिर आएको हो । प्रहरी अनुसन्धानका अनुसार वालले सन् १९९८ मा उड्डयन क्षेत्रमा आफ्नो करियर सुरु गरेका थिए । सन् २००९ मा नक्कली प्रमाण–पत्र पेश गर्दै उनी पाइलट-इन-कमान्ड अर्थात् क्याप्टेनको पदमा पदोन्नति हुन सफल भएका थिए। त्यसयता उनले वर्षौँसम्म हजारौँ यात्रु बोकेर व्यावसायिक उडानहरू भरिरहेका थिए ।

गत वर्ष पियर्सन विमानस्थलमा ट्रान्सपोर्ट क्यानडाले गरेको नियमित सञ्चालन जाँचका क्रममा उनको कागजातमा त्रुटि फेला परेको थियो । त्यस लगत्तै यो घटनाको विस्तृत छानबिनका लागि प्रोजेक्ट इकारसु नामक विशेष अनुसन्धान अभियान सुरु गरिएको थियो ।

आरोपीले ती नक्कली कागजातहरू कसरी तयार पारे र यति लामो समयसम्म सरकारी प्रणाली तथा वायुसेवा कम्पनीको आँखा छल्न कसरी सफल भए भन्नेबारे अनुसन्धान एजेन्सीहरूले थप छानबिन गरिरहेका छन् ।