काठमाडौँ : सुदूरपश्चिम प्रदेशको मुख्यमन्त्रीको जिम्मेवारी सम्हालेका खगराज भट्टले प्रदेशको नेतृत्व अवसरसँगै चुनौती र जिम्मेवारी पनि थपिएको बताएका छन् ।

उनले उपलब्ध स्रोत, साधन र परिस्थितिभित्र रहेर जनताले प्रत्यक्ष अनुभूति गर्न सक्ने गरी काम गर्ने प्रतिबद्धता व्यक्त गरेका छन् ।

नेपाल कम्युनिस्ट पार्टीको समर्थनमा मुख्यमन्त्रीका लागि दाबी पेस गरेका भट्टलाई प्रदेश प्रमुख नजिर मियाँले मुख्यमन्त्री नियुक्त गरेका हुन्  ।

नियुक्तिपछि सञ्चारकर्मीसँग प्रतिक्रिया दिँदै भट्टले प्रदेशका करिब २७ लाख नागरिकको नेतृत्व गर्ने अवसर प्राप्त हुनु आफ्ना लागि महत्वपूर्ण भए पनि यससँगै ठूलो जिम्मेवारी आएको बताए ।

मुख्यमन्त्री भट्टले पद प्राप्तिप्रति सन्तुष्टि रहे पनि त्यसलाई जिम्मेवारीको गम्भीरताले ओझेलमा पारेको धारणा राखे । प्रदेशको विद्यमान अवस्था, जनअपेक्षा र चुनौतीलाई ध्यानमा राखेर अघि बढ्नुपर्ने भएकाले आफूले जिम्मेवारीको भार महसुस गरेको उनको भनाइ थियो ।

उनले सुदूरपश्चिमका नागरिकलाई कार्यसम्पादनको केन्द्रमा राखेर प्रदेश सरकार सञ्चालन गर्ने बताए। जनताको आवश्यकता र अपेक्षालाई प्राथमिकतामा राख्दै परिणाममुखी काम गर्ने उनको प्रतिबद्धता छ ।

मुख्यमन्त्री भट्टले तत्कालै असाधारण परिवर्तन गरिदिने अवस्था नरहे पनि आफ्नो कार्यकालमा उपलब्ध सम्भावनाको अधिकतम उपयोग गर्दै सकारात्मक परिणाम दिने प्रयास गर्ने बताए । आफूले गरेका कामबाट नागरिकले सरकारको प्रयास सकारात्मक रहेको महसुस गर्ने वातावरण निर्माण गर्नु आफ्नो प्राथमिकता हुने उनको भनाइ थियो ।

उनले प्रदेश सरकार सञ्चालनमा लोकप्रियताभन्दा व्यावहारिक उपलब्धि, जनअपेक्षा सम्बोधन र जिम्मेवारीपूर्ण कार्यसम्पादनलाई प्राथमिकता दिने प्रतिबद्धता गरेका छन् ।