पाँचपटक प्रधानमन्त्री भइसकेकालाई छैटौँ पटक बन्न नपाएको असन्तुष्टि छ : गगन थापा

काठमाडौँ : नेपाली कांग्रेसका सभापति गगन थापाले पार्टी तथा राजनीतिमा जिम्मेवारी र पदलाई लिएर देखिने असन्तुष्टिप्रति व्यंग्यात्मक टिप्पणी गरेका छन् ।

काठमाडौँमा आयोजित कार्यक्रममा बोल्दै थापाले पाँचपटक प्रधानमन्त्री भइसकेको व्यक्ति छैटौँ पटक उक्त पदमा पुग्न नपाएको विषयमा असन्तुष्ट हुने अवस्था रहेको बताए । त्यस्तै, पार्टीको नेतृत्वमा दुई पटक जिम्मेवारी सम्हालिसकेकाले पुनः नेतृत्व गर्न नपाएकोमा असन्तुष्टि व्यक्त गर्ने प्रवृत्तिसमेत रहेको उनको भनाइ थियो ।

उनले राजनीतिक नेतृत्वमा रहेका व्यक्तिहरू स्वयं पनि प्राप्त जिम्मेवारी र पदका विषयमा असन्तुष्ट हुने गरेको उल्लेख गरे ।

थापाको टिप्पणी पूर्वप्रधानमन्त्री एवं काँग्रेसका पूर्वसभापति शेरबहादुर देउवातर्फ लक्षित देखिएको छ । देउवा नेपालमा पाँचपटक प्रधानमन्त्री भइसकेका नेता हुन् ।

उनले पछिल्लो समय राजनीतिक गतिविधि नीति, विचार र जनसेवाभन्दा राज्यका उच्च पद प्राप्त गर्ने विषयतर्फ बढी केन्द्रित हुँदै गएको धारणा पनि राखे ।