काठमाडौं : सत्तारुढ राष्ट्रिय स्वतन्त्र पार्टी (रास्वपा) का नेता तथा सांसदहरूको विदेश भ्रमणलाई लिएर पार्टीभित्रै असन्तुष्टि देखिन थालेको छ । विभिन्न अन्तर्राष्ट्रिय सम्मेलन तथा राजनीतिक भ्रमणमा सांसद र मन्त्रीहरूको बाक्लो सहभागिताप्रति आफ्नै पार्टीका नेताहरूले प्रश्न उठाउँदै भ्रमणको औचित्य, खर्चको स्रोत र त्यसबाट प्राप्त हुने उपलब्धिबारे स्पष्ट पार्न माग गरेका छन् ।
पछिल्लो समय जलवायु परिवर्तनसम्बन्धी सम्मेलन कोप–३१ मा सहभागी हुन नेपाली प्रतिनिधिमण्डलका सदस्यहरू टर्किए पुगेका छन् भने रास्वपाका २० जना नेता तथा सांसद चिनियाँ कम्युनिस्ट पार्टीको निमन्त्रणामा चीन भ्रमणमा निस्किएका छन् । यसबाहेक विभिन्न संसदीय तथा अन्तर्राष्ट्रिय कार्यक्रमका नाममा अन्य सांसदहरू पनि विदेश भ्रमणमा रहेका छन् ।
विदेश भ्रमणको यही बढ्दो क्रमलाई लिएर रास्वपाका सांसद गणेश कार्की, ज्वाला संग्रौला, आशिका तामाङ र राजु पाण्डेले सार्वजनिक रूपमा असन्तुष्टि व्यक्त गरेका हुन् ।
रास्वपा सांसद गणेश कार्कीले कोप–३१ मा सहभागी हुन टर्किए जाने नेपाली प्रतिनिधिमण्डलका सदस्यहरूले भ्रमणको खर्च कसले बेहोरेको हो भन्ने विषय सार्वजनिक गर्नुपर्ने बताएका छन् । सरकारी खर्चमा व्यक्तिगत रुचि पूरा गर्ने प्रवृत्ति स्वीकार्य नहुने उनको भनाइ छ ।
सामाजिक सञ्जालमार्फत धारणा सार्वजनिक गर्दै कार्कीले कोपमा सहभागी हुनु वातावरणसम्बन्धी ज्ञान र अनुभव हासिल गर्ने अवसर भए पनि त्यसलाई सरकारी स्रोतसाधन खर्च गर्ने आधार बनाउन नहुने बताएका छन् ।
उनले सरकारी खर्चमा गएको वा आफ्नै खर्चमा सहभागी भएको विषय स्पष्ट रूपमा घोषणा गर्न भ्रमणमा जानेहरूलाई आग्रह गरेका छन् ।
त्यस्तै, रास्वपाकी केन्द्रीय सदस्य तथा सांसद ज्वाला संग्रौलाले विदेश भ्रमणमा ठुलो समूह बनाएर जाने प्रवृत्तिमाथि प्रश्न उठाएकी छन् । विगतमा अन्य राजनीतिक दलका नेताहरूले सामूहिक रूपमा विदेश भ्रमण गर्दा आलोचना गर्नेहरू अहिले आफैँ त्यही अभ्यासमा संलग्न हुनु उचित नभएको उनको तर्क छ ।
सम्बन्धित देशले नै खर्च बेहोर्ने गरी विज्ञ तथा सांसदलाई निमन्त्रणा गरेको अवस्थामा भ्रमणलाई स्वाभाविक मान्न सकिने भए पनि राज्यकोषबाट रकम खर्च गरेर विदेश जाने अभ्यास गलत हुने उनले उल्लेख गरेकी छन् ।
आफू विदेश भ्रमणको अवसर नपाएर यस्तो धारणा राखेको नभई जनतामाझ पुगेर काम गर्नु बढी जिम्मेवारीपूर्ण ठान्ने उनको भनाइ छ ।
अर्की सांसद आशिका तामाङले पनि सांसदहरूको विदेश भ्रमणको संख्या, प्रक्रिया र उपलब्धिबारे प्रश्न गरेकी छन् । संसदीय समितिका नाममा हुने भ्रमणबारे सम्बन्धित समितिकै सदस्यहरूलाई समेत पर्याप्त जानकारी नहुने गरेको उनको गुनासो छ ।
राज्यको लाखौं रुपैयाँ खर्च गरेर गरिने भ्रमणको उद्देश्य र त्यसबाट देशले प्राप्त गर्ने उपलब्धि सार्वजनिक हुनुपर्ने उनले बताएकी छन् । भ्रमणपछि नीतिगत उपलब्धि र अनुभव सार्वजनिक गर्नुको सट्टा सामाजिक सञ्जालमा घुमफिरका तस्बिर र भिडियो मात्रै देखिने गरेको भन्दै उनले व्यंग्यसमेत गरेकी छन् ।
प्रधानमन्त्री वालेन्द्र शाहनिकट सांसद राजु पाण्डेले पनि जिम्मेवारीमा पुगेपछि नेताहरूको प्राथमिकता विदेश भ्रमण बन्ने गरेको भन्दै कटाक्ष गरेका छन् । पद र कुर्सी प्राप्त गरेपछि विदेश जाने चाहना बढ्ने राजनीतिक प्रवृत्तिप्रति उनले सामाजिक सञ्जालमार्फत असन्तुष्टि जनाएका हुन् ।
विदेश भ्रमणमाथि पार्टीभित्रै प्रश्न उठिरहेका बेला रास्वपाका महामन्त्री विपिनकुमार आचार्यको नेतृत्वमा २० सदस्यीय टोली चीन पुगेको छ । चिनियाँ कम्युनिस्ट पार्टीको निमन्त्रणामा गएको टोलीले ११ दिनसम्म चीनका विभिन्न सहरको भ्रमण गर्ने कार्यक्रम छ ।
टोलीमा सहमहामन्त्री हरि ढकाल, संसदीय दलका उपनेता गणेश पराजुली, प्रमुख सचेतक कविन्द्र बुर्लाकोटीसहित सांसदहरू लिमा अधिकारी, समीक्षा बाँस्कोटा, सागर ढकाल, डा. आनन्दबहादुर चन्द, सुशान्त वैदिक, रिमा विश्वकर्मा, डा. धनञ्जय रेग्मी, श्रीराम न्यौपाने, डा. राम लामा, गजला शमिम मिकरानी, पुनम अग्रवाल, रत्ना थापा, डा. सुजाता तामाङ, पुष्पाकुमारी चौधरी, अरविन्द शाह र रमेश सापकोटा छन् ।
टोलीले बेइजिङ, हाङ्चाउ र सिचुवानलगायत क्षेत्रको भ्रमण गर्नेछ । चीन प्रस्थान गर्नुअघि प्रतिनिधिमण्डलले प्रधानमन्त्री बालेन्द्र शाह र पार्टी सभापति रवि लामिछानेसँग छुट्टाछुट्टै भेट गरेको थियो ।
महामन्त्री आचार्यले भने चीन भ्रमणका क्रममा नेपालको राज्यकोषबाट कुनै खर्च नहुने दाबी गरेका छन् । भ्रमणको सम्पूर्ण व्यवस्थापन चिनियाँ कम्युनिस्ट पार्टीले नै गर्ने भएकाले सरकारी खर्च नलाग्ने उनको भनाइ छ ।
विदेश भ्रमणबारे पार्टीका सांसदहरूले उठाएका प्रश्नलाई विरोधका रूपमा बुझ्न नहुने पनि उनले बताएका छन् । भ्रमणको उद्देश्य, खर्चको स्रोत र त्यसमा सहभागी हुने व्यक्तिको उपयुक्तताबारे प्रश्न उठाउनु स्वाभाविक र आवश्यक भएको उनको भनाइ छ ।
.jpg)
.jpg)
