वीरगन्ज : संघीय मामिला तथा कानून मन्त्री अजय चौरसियाले नेपालबाट कुनैपनि शक्तिले कांग्रेस पार्टीलाई सिध्याउन नसक्ने बताएका छन् ।
वीरगञ्जमा नवनिर्मित कांग्रेस पर्साको पार्टी कार्यालयको उद्घाटन कार्यक्रममा बोल्दै कांग्रेस केन्द्रीय सदस्य समेत रहेका चौरसियाले यस्तो बताएका हुन् ।
कांग्रेस र लोकतन्त्रमाथि पटक–पटक आक्रमण भएको भन्दै उनले भने,‘कांग्रेस शहीदहरुको शहादत र आन्दोलनको जगबाट बनेको पार्टी हो । त्यसैले कसैले पनि सिध्याउन सक्दैन । कांग्रेसमाथि जति पटक आक्रमण हुन्छ, त्यति नै अझ बलियो र सशक्त भएर जान्छ ।’
कांग्रेस पार्टी लोकतन्त्र स्थापनाका लागि ५० औं वर्ष संघर्ष गरेको पार्टी रहेको भन्दै उनले हरेक राजनीतिक परिवर्तन कांग्रेसकै नेतृत्वमा भएको बताए ।
उनले भने,‘हामी एक भएर गयौ, मधेश प्रदेशमा पनि कांग्रेसको नेतृत्वमा सरकार बन्छ । हामी एक भयौ भने कांग्रेस आउने दिनमा अझ सशक्त र स्थापित भएर जाने निश्चित छ ।’ त्यसकारण सबै नेता कार्यकर्ताले आपसी तितामिठा कुरालाई बिर्सिएर एक भएर अगाडि बढ्नुपर्नेमा उनले जोड दिए ।
कानूनमन्त्री चौरसियाले वीरगञ्जमा सुविधा सम्पन्न पार्टी कार्यालयको निर्माण गरेर कांग्रेस पर्साले ऐतिहासिक काम गरेको बताए । उनले भने,‘पर्सामा कांग्रेसले गरेका धेरै कामहरुमध्ये सबैभन्दा राम्रो काम यो नै हो ।’
नेपाली कांग्रेस पर्साका सभापति तथा मधेस सरकारका कृषि जनार्दन सिंह क्षेत्रीको अध्यक्षता तथा कांग्रेस पर्साका सभापति शेरबहादुर देउवाको प्रमुख आतिथ्यतामा भएको कार्यक्रममा कांग्रेसका सहमहामन्त्री फरमुल्लाह मन्सुर,केन्द्रीय सदस्य तथा पूर्व उद्योगमन्त्री रमेश रिजाल,केन्द्रीय सदस्यहरु आनन्द ढुंगाना,अनिल रुंगटा, उमेशजंग रायमाझी, पूर्वमन्त्री सुरेन्द्र चौधरी, मधेश प्रदेशका पूर्वमन्त्री ओमप्रकाश शर्मा, प्रदेश सभा सदस्यहरु श्याम पटेल, शंकर चौधरी, नेता शोभाखर पराजुली, कांग्रेस मधेस प्रदेश सभापति कृष्ण यादव,महामन्त्री बृहस्पति कृष्ण श्रेष्ठ,कांग्रेस पर्साका उपसभापतिद्वय रामनारायण कुर्मी र अशोक गुप्ता,जिल्ला सचिवद्वय इम्तियाज आलम र दिनेश चौधरी लगायतकोपनि सहभागीता थियो ।
