रियाद : साउदी अरेबियाको इतिहासमै पहिलो पटक नेपाली चलचित्र ‘छक्का पञ्जा ५’ विभिन्न पाँच शहरका ९ हलमा प्रदर्शन भएको छ, जसलाई नेपाली कला र संस्कृतिको प्रवर्द्धनका रूपमा हेरिएको छ । तर यसलाई लिएर नेपाली समुदायमा केही भ्रम र बहस उत्पन्न भएपछि साउदी अरेबियास्थित नेपाली दूतावास, रियादले आधिकारिकरूपमा स्पष्टीकरण दिएको छ ।
दूतावासले आफ्नो फेसबुक पेजमा यस ऐतिहासिक घटनाबारे राखिएको जानकारीमूलक सूचनामा नेपाल सरकार र साउदी सरकारबीचको सहकार्यका कारण नेपाली चलचित्रलाई साउदी अरेबियामा प्रवेश गराउन सम्भव भएको जनाइएको छ । यो नेपाली चलचित्रको ऐतिहासिक उपलब्धिलाई साउदी अरेबियामा रहेका नेपाली समुदायका विभिन्न संघ–संस्थाहरूको सहकार्य र स्थानीय मञ्चहरूको सहयोगले सम्भव बनाएको उल्लेख गरिएको छ ।
कला, संस्कृति र कूटनीतिक सहयोग
दूतावासका अनुसार, नेपाली कला, संस्कृति, भाषा, साहित्य, नृत्य, संगीत, चलचित्र, पर्यटन, र व्यवसाय प्रवर्द्धनका लागि नेपाल सरकारको निर्देशनअनुसार विभिन्न गतिविधिहरू सञ्चालन हुँदै आएका छन् । नेपाली सांस्कृतिक पहिचानलाई अन्तर्राष्ट्रिय स्तरमा पुर्याउने उद्देश्यसहित विभिन्न सांस्कृतिक कार्यक्रमहरूको आयोजना गरिनुका साथै स्थानीय मञ्चहरूमा नेपाली संस्कृति र कलाका विविध पक्षहरूलाई प्रस्तुत गरिएको छ ।
नेपाली चलचित्रको साउदी अरेबियामा प्रवेशसँगै नेपाली कला र संस्कृतिलाई विश्वभर चिनाउने उद्देश्यलाई निरन्तर अघि बढाइने दूतावासले जनाएको छ । यस्ता गतिविधिहरूले नेपाल र साउदी अरेबियाबीचको सम्बन्धलाई थप सुदृढ बनाउन सहयोग पुग्ने विश्वास व्यक्त गरिएको छ ।
भ्रम निवारणको प्रयास
दूतावासले यस सन्दर्भमा समुदायमा देखिएको केही गलत बुझाइलाई चिर्दै स्पष्ट पार्दै भ्रमको निवारण गरेको छ । दूतावासले चलचित्र प्रदर्शनको जानकारीमूलक सन्देशलाई लिएर अनावश्यक भ्रम उत्पन्न भएको भन्दै यसमा कुनै द्विविधा नरहेको प्रष्ट पारेको छ । चलचित्र प्रदर्शनको यस प्रयासले साउदी अरेबियामा रहेका नेपाली समुदायको गर्व बढाएको बताउँदै आगामी दिनमा यस्ता कार्यक्रमहरूलाई निरन्तरता दिने योजना रहेको दूतावासले जनाएको छ ।
साउदी अरेबियामा कार्यरत नेपाली श्रमिकहरूको हित र सुरक्षाका लागि नेपाली दूतावास निरन्तर कार्यरत रहेको विज्ञप्तिमा उल्लेख गरिएको छ । विभिन्न कूटनीतिक प्रयासहरूमार्फत श्रमिकहरूको समस्या समाधानमा पहल गर्दै आएको दूतावासले परामर्श, सहयोग, र सामाजिक सेवाका कार्यक्रमहरू सञ्चालन गरिरहेको जनाइएको छ ।
