अर्घाखाँची : लुम्बिनी प्रदेशका शहरी विकास तथा खानेपानीमन्त्री रोज राणाले दीर्घकालीन राजनीतिक स्थायित्वका लागि नेपाली कांग्रेस र नेकपा एमालेबीच गठबन्धन सरकार बनेकाले यो सरकारले जनताको चाहाना पूरा गर्नुपर्ने बताएका छन् ।
गृह जिल्ला प्यूठान पुगेका मन्त्री राणाले विभिन्न कार्यक्रम हरुलाई सम्बोधन गर्दै कांग्रेस र एमालेबीच गठबन्धन बनेर लुम्बिनी प्रदेशमा पनि सरकार बनेकोले आफुहरुले जनताको चाहाना अपेक्षा अनुसार काम गर्ने बताउँदै केही मन्त्रालयहरु मन्त्री विहीन बन्दा कामले स्पिड लिन नसकेको बताए । उनले अब सरकारले छिट्टै पूर्णता पाउने पनि बताए ।
वर्तमान सरकारलाई सफल बनाउनु नेपाली कांग्रेसको मुख्य जिम्मेवारी भएकोले पनि आफुहरुले सोही अनुसार काम गरिरहेको उनले दाबी गरे ।
मन्त्री राणाले विगतमा धेरै प्रणाली र विकल्पहरूमा कांग्रेस–एमाले गएपनि राजनीतिक स्थायित्वका लागि अन्ततः दुई ठूला दल मिलेर सरकार गठन गरेकाले जनताले यो सरकारबाट धेरै कुरा अपेक्षा गरेको बताए । उनले कांग्रेस र एमालेको गठबन्धन दिर्घकालिन भएकोले यो सरकार सफल बनाउन जरुरी रहेको बताए ।
मन्त्री राणाले भने, ‘हामीले धेरै प्रणालीहरू अपनायौं । धेरै गठबन्धनहरू गरियो । अन्तिम विकल्पको रुपमा नेकपा (एमाले) र नेपाली कांग्रेस एकै ठाउँमा आएर सरकार बनेको छ । यो विकल्पलाई जसरी पनि सफल बनाउनुछ ।’
राणाले आफ्नो मन्त्रालय मातहतका विभिन्न भवन लगायतका आयोजनाहरूको काम भइरहेका ठाउँहरु विकास योजनाहरुको अब सबै ठाउँमा अनुगमन गर्ने बताए ।
मन्त्री राणाले प्रदेश सरकारसँग बजेट न्यून रहेको जनताका चाहना असिमित रहेकोले जनचाहना अनुसार काम गर्न नसकिएको बताउँदै प्यूठान जिल्लाको विकासमा कुनै कमि हुन नदिने जिकिर गरे ।
