जुम्ला : नसा  च्यापियर  थला परेका पातारासी गाउँपालिका–४ का  ३० वर्षीय मनसिंह नेपालीको आर्थिक अभावका कारण उपचार हुन सकेको छैन । उनी २०८० गत्त भदौदेखि थला परेका छन् । मनसिंहले भने, ‘शुरुमा प्रतिष्ठानमा जाँच गराएको थिए । त्यसपछि नेपालञ्जमा न्यूरो अस्पतालमा उपचारको लागि गए । त्यहाँ डाक्टरले शुरुमार्फत उपचार गर्नुपर्ने सल्लाह दिए ।’

डाक्टरका अनुसार १ वटा सुइको एक लाख मूल्य पर्ने बताएको थिए । उनले भने,‘सुरुमा ५ वटा सुइ लगाउनुपर्छ, त्यसपछि पनि सुधार भएपनि थप्नुपर्ने बताएका थिए ।’ उनले थपे,‘खुट्टाको घुँडादेखि तल हातको कुमदेखि तल चल्दैन । एक लाख खर्च गरेर औषधि गरेर नेपालगञ्जबाट घर आए । आर्थिक अभावका कारण थला परेको छु ।’

त्यस्तै  बिरामीकी श्रीमती सुशिला नेपालीले उपचार खर्च जुटाउन नसकेपछि घरमै ल्याएर राखेको बताइन् । उनले भनिन्,‘डाक्टरले उपचार लाखौं रुपैयाँ लाग्ने भन्नुभयो । त्यसपछि घरमै ल्याउनुपर्ने अवस्था आयो ।’

उनका अनुसार उपचारमा कम्तीमा दश लाख भन्दामाथि लाग्ने बताइन् । उनले भनिन्,‘हाम्रो परिवारमा यत्रो रकम जुटाउन नसक्ने भएपछि आफूहरू तनावमा परेको छौँ । साथमा दुइ वर्षकी छोरी छन् ।  बच्चासँग काहीँ काम गरौँ भने यहाँ केही काम पाइँदैन ।’ उनले आफ्नो श्रीमानको ज्यान बचाउनका लागि सहयोग गरिदिन सबै सहयोगी संस्था तथा सहयोगी मनहरुलाई अनुरोध गरिन् । 

नसा च्यापिएको उपचार भएमा बाँचेर केही गर्ने इच्छा रहेको नेपालीले बताए । उनले भने, ‘उपचार गर्न पैसा छैन । सहयोगको लागि आग्रह गर्दछु । उपचार खर्च सहयोग गर्नुस् म बाँच्न चाहन्छु ।’ उनले सहयोगका लागि उनले आफ्नो मोबाइल नम्बर ९७ ४९९६८६२९ मा सम्पर्क गर्न आग्रह गरे । 

त्यस्तै पारासी गाउँपालिकाका उपाध्यक्ष जुनमाया रोकायाले मनसिंहको उपचारको लागि कार्यपालिकासँग कुरा राख्ने बताइन् । उनले भनिन्,‘आफ्नो नागरिकको ज्यान जोगाउनु हाम्रो कतव्र्य पनि हो । उपचारको लागि पहल गर्नेछौं ।’

त्यस्तै नेकपा माओवादी केन्द्रबाट प्रतिनिधिसभा सदस्य सांसद छिरिङ ल्यामो लामा तामाङले  नेपालीलाई भेटेर उपचारका लागि पहल गर्ने बताइन् । उनले कमजोर आर्थिक हैसियत भएका कारण उपचार नपाएका नेपालीको उपचार गर्नका लागि सबैसँग सहयोगको आग्रह गर्ने बताइन् ।