काठमाडौं : श्रम, रोजगार तथा सामाजिक सुरक्षा मन्त्रालयले साउदी अरेबिया र यूएईका लागि काउन्सिलर श्रम तथा कतार र बहराइनका लागि श्रम सहचारी नियुक्त गरेको छ । साउदी अरेबियाको काउन्सिलर श्रममा उपसचिव कविराज उप्रेती र यूएईका लागि दिपेन्द्र पौडेल नियुक्त भएका छन् । 

उप्रेतीले वैदेशिक रोजगार विभाग र पौडेलले वैदेशिक रोजगार बोर्ड र मन्त्रालयमा लामो समय काम गरेका थिए । उपसचिव मैयाँ कँडेल काउन्सिलर श्रम प्रतीक्षा सूचीमा रहेकी छन् । 

कतारको श्रम सहचारीमा सुनिता थापा र बहराइनका लागि प्रेम प्रसाद पोखरेल नियुक्त भएका छन् । शाखा अधिकृत किरन कुमार रजक प्रतीक्षा सूचीमा रहेका छन् ।

हाल यूएईमा दीनबन्धु सुवेदी, साउदी अरेबियामा देवेन्द्र कार्की काउन्सिलर श्रम र बहराइनमा जमुना काफ्ले तथा कतारमा कृष्ण पौडेल श्रम सहचारीको जिम्मेवारीमा रहेका छन् । मन्त्रालयले दक्षिण कोरियासहित खाडीका केही मुलुकमा नयाँ काउन्सिलर श्रम र श्रम सहचारी नियुक्ति प्रक्रिया जारी राखेको छ ।

मन्त्रालयले दक्षिण कोरिया, कतार र मलेसियाका लागि काउन्सिलर श्रम र नेपाली दूतावास अबुधाबी, नेपाली महावाणिज्य दूतावास साउदी जेद्दा, नेपाली दूतावास मलेसिया तथा ओमानका लागि श्रम सहचारी नियुक्तिका लागि प्रक्रिया जारी राखेको छ । त्यसका लागि मन्त्रालयले भदौ ३१ गते आवेदकहरूको प्रस्तुतीकरण लिएको छ ।

काउन्सिलर श्रमका लागि उपसचिव र श्रम सहचारीका लागि शाखा अधिकृतले आवेदन दिन पाउने व्यवस्था छ । परराष्ट्र मन्त्रालयले पछिल्ला दिनमा मागपत्र प्रमाणीकरणको जिम्मेवारीलगायतका काममा काउन्सिलर श्रम र श्रम सहचारीहरूको भूमिका खुम्च्याइरहेको गुनासो बढेपनि श्रम मन्त्रालयमा कार्यरत उपसचिवलाई काउन्सिलर श्रम तथा शाखा अधिकृतलाई श्रम सहचारी पदमा उच्च आकर्षण र प्रतिस्पर्धा छ ।

मन्त्रालय, वैदेशिक रोजगार विभाग, श्रम तथा व्यवसायजन्य सुरक्षा विभाग र मातहत कार्यालय, राष्ट्रिय प्रशिक्षण प्रतिष्ठान, वैदेशिक रोजगार बोर्ड र सामाजिक सुरक्षा कोषमा कम्तीमा एक वर्ष काम गरेकोे उपसचिवले काउन्सिलर श्रम र शाखा अधिकृतले श्रम सहचारीमा आवेदन दिन पाउने व्यवस्था छ । मन्त्रालय मातहत काजमा आएका कर्मचारीले आवेदन दिन पाउँछन् भने मन्त्रालयलमा दरबन्दी भइ एक वर्षअघि काजमा गएका कर्मचारीले भने आवेदन दिन नपाउने व्यवस्था छ ।

दुबै पदका आकांक्षीले अंग्रेजी भाषामा आईईएलटीएस टेष्टमा ओभरअलमा ६ प्वाइन्ट, टोफल, पिबिटी, सिबिटीमध्ये कुनै परीक्षामा कम्तीमा ५५०२१३.७९ हासिल गरेको वा पीटीई परीक्षामा कम्तीमा ५१ अंक प्राप्त गरेको हुनुपर्ने प्रावधान छ । ज्येष्ठता र अनुभवका लागि १५ अंक, अंग्रेजी भाषा ज्ञानका लागि १० अंक, व्यावसायिक कार्ययोजना र प्रस्तुतीकरणका लागि १० अंक र सचिवको मूल्यांकनबापत ५ अंक गरी ४० पूर्णांकको परीक्षामा बढी अंक प्राप्त गर्नुपर्नेछ । सबै प्रस्तुति पनि सचिवले ५ अंक दिने प्रणालीले नतिजा धेरै हदसम्म सचिवको ५ अंकमा निर्भर हुने यसअघि उक्त पदमा छनोट हुन नसकेका आकांक्षीहरूले टिप्पणी गर्ने गरेका छन् ।