साउदी : साउदी अरेबियामा घरेलु कामदारले रोजगारदाता (स्पोन्सर) बदल्न पाउने भएका छन् । साउदी अरेबियाले घरेलु श्रमिकको भर्ना प्रणालीमा सुधार गर्दै रोजगारदाता र श्रमिकबीचको सम्बन्ध सुधार गर्ने उद्देश्यले नयाँ नीति सार्वजनिक गरेको हो । रोजगारदाता परिवर्तनका लागि २ महिनाको समय दिइएको छ । 

साउदीको मानव संशाधन मन्त्रालयका अनुसार घरेलु श्रमिक आएको पहिलो २ वर्षभित्र सम्झौता भंग गरेमा त्यसको  दुई महिनाभित्र देश छाड्नुपर्ने वा श्रमिकले २ वर्षपछि काम गर्न छाडेमा ६० दिनभित्र नयाँ रोजगरदाता परिवर्तन गर्न पाउनेछन् ।

नेपालले श्रम स्वीकृति दिएर घरेलु कामदारको रूपमा साउदी अरेबिया जान प्रतिबन्ध लगाए पनि सेटिङको आधारमा अवैधानिकरूपमा ठूलो संख्यामा पुगेका छन् । साउदीको पछिल्लो निर्णयले उनीहरूले लाभ पाउने बताइएको छ । घरेलु कामदारभित्र महिला कामदारसहित निजी ड्राइभर र मालीलगायतका काम गर्ने कामदार पर्ने गरेका छन् ।

नेपालले घरेलु श्रमिकमाथि शोषण हुने, तर सुनुवाइ हुने औपचारिक प्रणाली नभएको भन्दै संसदीय समितिको निर्देशनमा ९ वर्षदेखि श्रम स्वीकृति रोकेको छ । औपचारिक क्षेत्रमा कामदार पठाउने अन्य दक्षिण एशियाली मुलुकहरूले पनि असुरक्षाको कारण देखाउँदै घरेलु कामदार नपठाउँदा हाल साउदी अरेबियामा घरेलु कामदारको अभाव बढेको छ । सोही माग पूरा गर्न उक्त मुलुकले कानूनमा सुधार गरेर घरेलु कामदारलाई सुरक्षाको ग्यारेन्टी गरेको सन्देश प्रवाह गर्न खोजिरहेको आंकलन गरिएको छ ।