बझाङ : नेपाल र चीन बीचको ऐतिहासिक सम्बन्धलाई थप प्रगाढ बनाउने उद्देश्यले बझाङ र हुम्लाको सीमा नजिक दुवै देशका अधिकारीहरूबीच उच्चस्तरीय बैठक बस्ने भएको छ ।
यही कात्तिक २८ र २९ गते अर्थात् यही १३ र १४ नोभेम्बरमा चीनको पुलान काउन्टीमा बस्ने बैठकमा नेपाल र चीनका सीमावर्ती क्षेत्रका प्रमुखहरूको सहभागिता रहने बताइएको छ ।
चिनियाँ पक्षबाट डिन्जुप्राम ताउन्टीको सीपीसी समितिका उपसचिव तथा सरकार प्रमुख, काउन्टी स्थायी समिति सचिव ओ टीप्पर्ण, सार्वजनिक सुरक्षा ब्यूरो निर्देशक निरीक्षक जनरल र जे पाउलिन, अध्यागमन तथा सीमा नियन्त्रण प्रमुखलगायत उच्च अधिकारीहरू सहभागी हुनेछन् ।
नेपालतर्फबाट भने सीमा जोडिएका बझाङको साइपाल र सुर्मा गाउँपालिका, दार्चुलाका ३ वटा पालिका र हुम्लाका ४ वटा पालिकाका प्रतिनिधिहरू सहभागी हुने जनाइएको छ ।
यस बैठकमा दुवै देशबीचको व्यापार, पर्यटन, पूर्वाधार विकास, सीमा सुरक्षा, सहयोग आदान–प्रदान, पालिकालाई सहयोग गर्ने र जनस्तरको सम्बन्धलाई थप प्रगाढ बनाउने विषयमा व्यापक छलफल हुने साइपाल गाउँपालिका उपाध्यक्ष डोल्मा तामाङले बताइन् ।
दुवै पक्षले सीमावर्ती क्षेत्रका जनताको हितलाई ध्यानमा राखेर सहकार्यलाई अझै बढाउने प्रतिबद्धता जनाउने छन् । यस बैठकले नेपाल र चीनबीचको सम्बन्धलाई नयाँ उचाइमा पु¥याउन महत्वपूर्ण भूमिका खेल्ने विश्वास गरिएको छ । बैठकका लागि साइपाल गाउँपालिकाका जनप्रतिनिधि हुम्ला पुगिसकेका छन् भने सुर्मा गाउँपालिकाका जनप्रतिनिधि नेपालगञ्जबाट हवाइयात्रा गरी हुम्ला जाने बताइएको छ ।
