अहिले छिमेकी मित्रराष्ट्र चीनको औपचारिक भ्रमणमा छन् हाम्रा प्रधानमन्त्री केपी शर्मा ओली । पछिल्लो पटक गत असारमा प्रधनमन्त्री बनेका ओलीले पहिलो विदेश भ्रमण उत्तरतिरबाट गरेका छन् । प्रायः दक्षिणको भ्रमण पहिलो हुने गरेको सन्दर्भ जोडेर ओलीको यो भ्रमणबारे अनेक कोणबाट विश्लेषण भएका छन् । यद्यपि, एउटा सार्वभौम मुलुकका सरकार प्रमुखको पहिलो भ्रमण कहाँबाट गर्ने भन्ने त्यो देश वा सरकारको विषय हो । हाम्रा लागि सबै छिमेकी मित्रराष्ट्रहरू समान हुन् । पञ्चशील र असंलग्न नीतिका आधारमा हाम्रा कूटनीतिक सम्बन्धहरू चल्छन्/चलिरहेका छन् ।
चीन हाम्रो सन्दर्भमा भौगोलिक, आर्थिक दुवै दृष्टिले अर्थपूर्ण र महत्त्वपूर्ण छिमेकी हो । चीन हाम्रो भौतिक विकासको सहयोगी पनि हो । अनेकौं योजना, परियोजनामा चीनले गरेको सहयोग अविष्मरणीय छ हाम्रा लागि । सडक पूर्वाधार होस् वा स्वास्थ्यका क्षेत्रमा अथवा अन्य धेरै क्षेत्रमा चीनको सहयोग हामीलाई प्राप्त भइरहेको छ । अहिले प्रधानमन्त्रीको यो भ्रमणमा पनि विभिन्न परियोजना प्रस्तावको तयारी छ । ती परियोजनाले नेपालको भौतिक विकासमा मात्र नभएर नेपालीको आर्थिक तथा जीवनस्तर उन्ननयमा समेत सहयोग पुग्ने आस गर्न सकिन्छ । बीआरआईको विषय प्रमुख रूपमा उठिरहे पनि हाम्रा लागि अन्य परियोजना प्रस्ताव बढी चासोका विषय हुन सक्छन् । यतातर्फ पक्कै पनि प्रधानमन्त्री र भ्रमणमा संलग्न प्रतिनिधिहरूको ध्यान जाने छ ।
चीनसँगको हाम्रो व्यापार घाटा चुलिँदो छ । हामी उताबाट सामान आयात गरिरहेका छौं तर यताबाट पर्याप्त उता पठाउन सकिरहेका छैनौं । यसले चीनसँगको हाम्रो व्यापारिक सम्बन्ध सन्तुलनमा देखिँदैन । व्यापारी, उद्योगी, अर्थविद्लगायतको समूह पनि भ्रमणमा संलग्न छ । पक्कै पनि यस विषयमा चीनसँग विमर्श हुने नै छ । सीमानाकामा रहेका भन्सार बिन्दुका सवाल होलान् वा भन्सारका, करका आदि विषय पनि होलान् । तीसम्बन्धमा पनि हाम्रा तर्फबाट विमर्श हुनु र त्यसमा सहजताका निम्ति पहल हुनु आवश्यक छ । समग्रमा, नेपाल–चीन सम्बन्धका सबैजसो आयाममा भ्रमणले विशेष ध्यान दिन सकोस् भन्ने कामना हामीले गर्नु अन्यथा हुँदैन ।
