दोहा, कतार : कतारमा रहेका सामाजिक संस्थाहरूमा सक्रिय संस्था बागलुङ सेवा समाज कतारले गण्डकी प्रदेशभित्रका जिल्ला संस्थाहरूलाई समेट्दै वनभोज तथा भेटघाट कार्यक्रम सम्पन्न गरेको छ । शुक्रबार कतारको वक्रामा अवस्थित समुन्द्री किनारमा विविध सांगीतिक तथा खेलकुद गतिविधि आयोजना गर्दै कार्यक्रम सम्पन्न गरेको हो ।

कार्यक्रम गैरआवासीय नेपाली संघ, राष्ट्रिय समन्वय परिषद् (एनआरएनए एनसीसी) कतारका अध्यक्ष रमेश भट्टको प्रमुख आतिथ्यता तथा समाजका अध्यक्ष नीराजन गौतमको सभाध्यक्षतामा सम्पन्न भएको हो । कतारका लागि नेपाली पर्यटन दूत राजेन्द्र कुमार शर्मासहित गण्डकी प्रदेश समन्वय परिषद् कतारका प्रतिनिधि, जिल्ला अध्यक्ष तथा प्रतिनिधिहरूको विशेष उपस्थितिसहित शुभकामना मन्तव्यसमेत राखेका थिए ।

आफ्नो शुभकामना मन्तव्य राख्दै प्रमुख अतिथि भट्टले वनभोज एक नेपाली संस्कार जस्तै रहेको हुँदा यसले आपसी भाइचारा बढ्ने विश्वास व्यक्त गरे । इतिहासको कालखण्डलाई हेर्दा कुनै समय आफैंले बागलुङ सेवा समाज कतारको नेतृत्व गरेको स्मरण गर्दै भट्टले सामाजिक क्षेत्रमा आफ्ना सफल कदमहरूको श्रेय समाजलाई जाने बताए । करिब दुई दर्जन सहभागीहरूले घैँटो फोड खेलमा सहभागिता जनाए पनि रेबिका बिक र यमुना पटेलले सही निशान लगाएर घैँटो फोडी जनही ५१ कतारी रियाल पुरस्कार प्राप्त गरे । पटेलले कार्यक्रममा आफ्नो नृत्य पेस गरिन् भने समाजका सांस्कृतिक संयोजक बाबु कौसले स्वागत गीत पेस गरे । प्रथम उपाध्यक्ष टेक रसाइलीले मन्तव्यमार्फत कार्यक्रममा उपस्थितलाई स्वागत गरेका थिए ।

समाजका सचिव सुवास पौडेलले सहजीकरण गरेको कार्यक्रमको समापन गर्दै सभाध्यक्ष गौतमले वनभोज तथा भेटघाटले आपसी भावना साटासाट गर्दै पुराना स्मृतिहरू ताजगी गर्ने र भविष्यका योजनाहरूको बारेमा एकजुट भएर अगाडि बढ्न हौसला मिल्ने बताए ।