जुम्ला : जिल्ला प्रहरी कार्यालय जुम्लाले हिरासतमा रहेका थुनुवाहरूलाई न्यानो कपडा वितरण गरेको छ । चिसोबाट जोगाउनका लागि ओढ्ने तथा ओछ्याउने कपडा वितरण गरिएको हो ।

पातारासी गाउँपालिका-२ तल्फिका धनसिंह बोहोराको सहयोगमा १० वटा र उद्योग वाणिज्य संघको सहयोगमा ५ वटा गरी १५ वटा कम्बल र डस्ना, सिरक वितरण गरिएको प्रहरी नायब उपरीक्षक छेदीलाल कामतीले जानकारी दिए । उनले थुनुवालाई न्यानो कपडा सहयोग गरेकोमा आभार व्यक्त गरे ।

चन्दननाथ-६ का वडाध्यक्ष रवि थापाले थुनुवालाई न्यानो कपडा वितरण गर्नु सराहनीय काम रहेको बताए ।

पातारासी गाउँपालिका २ तल्फिका धनसिंह बोहोराले आफूले व्यक्तिगत रूपमा २५ हजार रुपैयाँ बराबरको न्यानो कपडा वितरण गरेको बताए । हिमाली जिल्ला जुम्लामा बढ्न थालेको चिसोबाट गरिब, विपन्न तथा आर्थिक अवस्था न्यून भएका नागरिकको पहिचान गरी न्यानो कपडा वितरण गर्न जरुरी रहेको सरोकारवालाहरु बताउँछन् ।