काठमाडौं : नृत्य निर्देशक, कलाकार तथा मोडेल प्रमिला रिजाल इन्टरनेशनल सोसाइटी फर द परफर्मिङ आर्ट्स (आइएसपीए) को सम्मेलनमा सहभागी भएकी छन् ।
इन्टरनेशनल सोसाइटी फर द परफर्मिङ आर्ट्स अमेरिकाको निमन्त्रणामा रिजालसहित विभिन्न कला क्षेत्रको प्रतिनिधित्व गर्ने ५० भन्दा बढी क्षेत्रका ५०० भन्दा बढी विज्ञहरुको सम्मेलनमा सहभागिता रहेको थियो । सम्मेलन अमेरिकाको न्युयोर्कमा जनवरी १४ देखि १६ सम्म आयोजना भएको थियो ।
आइएसपीएको उद्देश्य नेतृत्वको विकास, विचारको आदानप्रदान तथा संलग्न सदस्यता बढाएर विश्वव्यापी रूपमा प्रदर्शन कलालाई बलियो बनाउनु हो ।
सम्मेलनमा रिजालले आयोजकलगायत सहभागी प्रतिनिधिहरूलाई नेपाली कला संस्कृतिको विषयमा जानकारी गराउँदै भविष्यमा सरकारी तथा गैरसरकारी निकायबाट नेपालमा पनि यस्तै कार्यकम गर्न सकिने बताइन् ।
