.jpg)
काठमाडौं : नेकपा माओवादी केन्द्रका अध्यक्ष एवम् पूर्वप्रधानमन्त्री पुष्पकमल दाहाल 'प्रचण्ड’ले तत्काल नेपाली कांग्रेससँग सहकार्य नहुने बताएका छन् ।
बिहीबार सुर्खेत विमानस्थलमा पत्रकारहरूसँग कुरा गर्दै उनले तत्काल कांग्रेससँग सत्ता साझेदारी नगर्ने बताए ।
सरकारमा जाने कुनै अभिरुची नभएको उल्लेख गर्दै प्रचण्डले सरकार सहज ढंगले नचलेको बताए । यो गठबन्धन भने धेरै समय नटिक्ने उनको तर्क छ । तर आफूहरूले अहिले सक्रिय भएर सरकार ढाल्न नलागेको उनको भनाइ थियो ।
प्रचण्डले प्रधानमन्त्री केपी शर्मा ओलीले अध्यादेशमार्फत देश चलाउन खोजेको आरोप लगाए ।
उनले संसद आह्वान गर्नुको सट्टा विभिन्न अध्यादेश ल्याउनु गलत भएको बताए ।
सरकारले नियमित रूपमा सदन नबोलाएपछि प्रतिपक्षी दलका तर्फबाट माओवादीले विशेष अधिवेशन आह्वानको प्रयास गरेको उनले बताए ।
