बर्दियाः बढैयाताल गाउँपालिका–८ साघुनघारीबाट ब्राउनसुगर जस्तो देखिने पदार्थ ४ सय ७० मिलिग्रामसहित २ जनालाई बिहीबार राति प्रहरीले पक्राउ गरेको छ ।

पक्राउ पर्नेहरूमा सोही नगरपालिका–८ नयाँबस्ती बस्ने २४ वर्षीय शिव गौतम र २४ वर्षीय सुमन थारू रहेका छन् । प्रहरी चौकी कालिकाबाट खटिएको प्रहरीले भारतबाट नेपालतर्फ साइकलमा आँउदै गरेका उनीहरूलाई उक्त पदार्थसहित पक्राउ गरेको हो । 

यस्तै, दाङको घोराही उपमहानगरपालिका–१३ सुनगाभा टोलबाट अवैध लागुऔषध ब्राउनसुगर जस्तो देखिने पदार्थ ८ सय ७० मिलिग्राम, नगद ४ हजार ५ सय रूपैयाँ र २ थान मोबाइल सहित २ जनालाई बिहीबार दिउँसो प्रहरीले पक्राउ गरेको छ । 

पक्राउ पर्नेहरूमा राप्ती गाउँपालिका–३ मसुरिया घर भइ घोराही उपमहानगरपालिका–१३ प्रगतिटोल बस्ने २२ वर्षीय चिन्तन केसी र सोही उपमहानगरपालिका–१३ डुम्मरगाउँ बस्ने १९ वर्षीय मनोज बुढामगर रहेका छन् । 

अस्थायी प्रहरी पोष्ट बसपार्कबाट खटिएको प्रहरीले  चिन्तनको साथबाट १ सय ९०  मिलिग्राम र मनोजको साथबाट ६ सय ८० मिलिग्राम उक्त पदार्थ फेला पारी पक्राउ गरेको हो । साथै उनीहरूले प्रयोग गरेको लु.१८ प ३७७० नम्बरको मोटरसाइकल समेत प्रहरीले बरामद गरेको छ । यस सम्बन्धमा प्रहरीले आवश्यक अनुसन्धान गरिरहेको छ ।