डोल्पा : हिमाली जिल्ला डोल्पाका ३ पालिकाका निमित्त प्रमुख प्रशासकीय अधिकृतको जिम्मेवारी खोसिएको छ । काइके गाउँपालिका, त्रिपुरासुन्दरी नगरपालिका र जगदुल्ला गाउँपालिकाका निमित्त प्रमुख प्रशासकीय अधिकृतको जिम्मेवारी खोसिएको हो ।
डोल्पाको काइकेमा सम्झना पराजुलीले निमित्त प्रमुख प्रशासकीय अधिकृतको जिम्मेवारी सम्हालिरहेकी थिइन् । उनी नेपाल विविध सेवा अधिकृत स्तर छैटौं तहकी कर्मचारी हुन् । त्यस्तै, त्रिपुरासुन्दरीको निमित्त प्रमुख प्रशासकीय अधिकृतको जिम्मा सम्हालिरहेका हिराचन्द्र धरला नेपाल प्रशासन सेवा सामान्य प्रशासन समूह अधिकृत स्तर छैटौं तहका कर्मचारी हुन् । उपसचिव जगदीशचन्द्र नेपालीको सरुवा भएलगत्तै धरलाले निमित्त प्रमुख प्रशासकीय अधिकृतको जिम्मा सम्हालिरहेका थिए ।
जगदल्ला गाउँपालिकाको निमित्त प्रमुख प्रशासकीय अधिकृतको जिम्मा सम्हालिरहेका केशवराज जैशी नेपाल प्रशासन सेवा सामान्य प्रशासन समुह सहायक स्तर पाँचौं तहका कर्मचारी हुन् ।
संघीय मामिला तथा सामान्य प्रशासन मन्त्रालयले शुक्रबार डोल्पाका ३ सहित १६ स्थानीय तहका कनिष्ठ निमित्त प्रमुख प्रशासकीय अधिकृतहरूको आर्थिक तथा प्रशासनिक अधिकार खोस्ने निर्णय गरेको छ ।
यस निर्णयसँगै कानुनविपरीत प्रमुख प्रशासकीय अधिकृतको जिम्मेवारी दिइएका नेपाल स्वास्थ्य सेवा, शिक्षा सेवा तथा स्थानीय प्रशासन सेवाका कनिष्ठ अधिकृतहरूको जिम्मेवारीसमेत खोसिएको छ ।
पछिल्लो समय संघीय, प्रदेश तथा स्थानीय तहका जनप्रतिनिधिहरूको साँठगाँठमा मनपरी सरुवा गर्दै कनिष्ठ कर्मचारीलाई प्रमुख प्रशासकीय अधिकृतको निमित्त बनाई काम गराउने प्रवृत्ति बढ्दो छ । यसले कर्मचारी व्यवस्थापनलाई जटिल बनाउनुका साथै बेथितिलाई नै वैधता दिने प्रयास भइरहेको छ भन्ने प्रशासनविद्हरू बताउँछन् ।
यसअघि पनि मन्त्रालयले १० नगरपालिका र १३ गाउँपालिकामा कानुनविपरीत नियुक्त गरिएका निमित्त प्रमुख प्रशासकीय अधिकृतहरूको जिम्मेवारी रद्द गरिसकेको थियो ।
.jpg)
