कपिलवस्तु : कृष्णनगर नगरपालिका–२ यात्रु गेट नजिकैबाट ठूलो मात्रामा चरेससहित तीन जना पक्राउ परेका छन् ।
कृष्णानगर प्रहरी विशेष टोलीले रोल्पाका ४८ वर्षीय प्रेमसरी रोका, रुकुम पूर्वकी २६ वर्षीया सरिता पुन मगर र कपिलवस्तु शिवराज–९ का ६६ वर्षीय सुकलाल घर्ती मगरलाई चरेससहित पक्राउ गरेको हो । उनीहरूको साथबाट १४ किलो ७७४ ग्राम चरेस बरामद गरिएको प्रहरीले जनाएको छ ।
प्रहरीका अनुसार प्रेमसरीको साथबाट ५ किलो ९६८ ग्राम, सरिता पुन मगरको साथबाट ५ किलो ६७८ ग्राम, र सुकलाल घर्ती मगरको साथबाट ३ किलो १२८ ग्राम चरेस जस्तो देखिने पदार्थ फेला परेको हो । साथै उनीहरूको साथबाट तीन वटा मोबाइलसमेत बरामद गरिएको थियो ।
पक्राउ परेका तीनै जनाविरुद्ध लागुऔषध सम्बन्धी मुद्दामा अनुसन्धान भइरहेको ईलाका प्रहरी कार्यालय कृष्णानगरले जनाएको छ । कपिलवस्तु जिल्ला अदालतबाट १० दिनको म्याद थप गरेर अनुसन्धान अघि बढाइएको छ ।
