काठमाडौं : एसियाली विकास बैंक (एडीबी) ले सन् २०२१ म नेपालको आर्थिक बृद्धिदर १.५ प्रतिशत रहने प्रक्ष्येपण गरेको छ । जबकी नेपाल सरकारले भने यो वर्ष सात प्रतिशत हाराहारीमा आर्थिक वृद्धिदर हुने लक्ष्य राखेको छ । गएको अप्रिलमा मात्रै एडीबीले सन् २०२१ को प्रक्ष्येपाणमा ६.४ प्रतिशत आर्थिक वृद्धिदर हुने अनुमान गरेको थियो । तर, कोरोना महामारीका कारण आर्थिक गतिविधि ठप्प भएकाले पूर्व अनुमानमा ब्यापक हेरफेर गर्दै १.५ प्रतिशत कायम हुने अनुमान गरेको हो ।
केही समय अगाडि विश्व बैंकले पनि आर्थिक वृद्धिदर सम्बन्धी अनुमान सार्वजनिक गरेको थियो । विश्व बैंकले भने नेपालको आर्थिक वृद्धिदर २.१ प्रतिशत रहने अनुमान गरेको थियो । अर्थात्, एडीबी र विश्व बैंककै अनुमानमा समेत पनि ठूलो अन्तर देखिएको छ । अझ सरकारले लिएको लक्ष्य भन्दा धेरै तल राखेर यी दुई निकायले आर्थिक प्रक्ष्येपण गरेका छन् ।
एडीबीले सन् २०२ मा नेपालको आर्थिक वृद्धिदर २.३ रहने अनुमान गरेको छ । तर, नेपाल सरकारले यसबारे प्रगति सूचक सार्वजनिक गरेको छैन । एडीबीले दक्षिण एसियाली मुलुकहरुको अर्थतन्त्र कोरोना महामारीका कारण नराम्रोसँग खुम्चन पुगेको उल्लेख गरेको छ । मुख्यगरी पर्यटन क्षेत्रमा ठूलो असर परेको छ ।
एडीबीको रिपोर्ट अनुसार, सवैभन्दा राम्रो अवस्थामा माल्दिभ्स छ । माल्दिभ्सको आर्थिक वृद्धिदर १०.५ प्रतिशत हुने अनुमान गएिको छ । भारत ८ प्रतिशत, बंगलादेश ६.८ प्रतिशत, श्रीलंका ४.१ प्रतिशत, पाकिस्तान २ प्रतिशत, भुटानमा १.७ प्रतिशत रहने अनुमान गरिएको छ । नेपाल र अफगानिस्तान सवैभन्दा कम अर्थात् १.५ प्रतिशत आर्थिक वृद्धिदर हुने अनुमान गरिएको छ । समग्रमा दक्षिण एसियाली मुलुकहरुको आर्थिक वृद्धिदर ७.१ प्रतिशत रहने एडीबीको अनुमान छ ।
तर, सन् २०२० सम्म भने दक्षिण एसियाली मुलुकहरुको आर्थिक वृद्धिदर माइनसमै झर्ने अनुमान गरिएको छ । एडीबीले सन् २०२० को अन्त्यमा सगम्र अवस्था –६.८ प्रतिशतमा झर्ने अनुमान गरेको छ । तर, यसको एक वर्ष पछाडि भने अर्थतन्त्रमा सुधार आउँदै ७.१ प्रतिशतमा पुग्ने अनुमान गरिएको छ ।
