रुकुमपूर्व : रुकुमपूर्वको पुथा उत्तरगंगा गाउँपालिका–८ मा रहेको जनसहयोग माध्यमिक विद्यालयको छानो हावाहुरीले उडाएको छ । शनिबार राति परेको पानीसहितको हावाहुरीले करिब ६ लाख बराबरको क्षति भएको विद्यालयले जनाएको छ । हावाहुरीले भवनको छानाका दार भाँचिएसँगै जस्तापाता उडाएको विद्यालयका प्रधानध्यापक गोकेन्द्रजंग मल्लले जानकारी दिए ।
उनका अनुसार हाल विद्यालयमा परीक्षा सञ्चालन भइरहेकाले केही समय परीक्षा समेत अवरुद्ध भएको थियो । तर वैकल्पिक व्यवस्था गर्दै अर्को भवनमा परीक्षा सञ्चालन गरिएको छ ।
विद्यालय भवन क्षतिग्रस्त भएकाले विद्यार्थी र शिक्षकहरूलाई कक्षाकोठा अभाव भएको छ । विद्यालय व्यवस्थापन समितिका अध्यक्ष काले मल्लले विद्यालयको क्षतिको विवरण संकलन गरेर चाँडै बैठक बस्ने र पुनर्निर्माण प्रक्रिया अघि बढाउने बताए । साथै, क्षतिको विवरण सम्बन्धित निकायमा बुझाइने र तत्काल पुनर्निर्माणका स्थानीय सरकारसँग पहल कदमी अगाडि बढाइने उनले बताए ।
