काठमाडौं : एक पक्षीय र पार्टीको नीतिविपरीत तालमेल गरेको दाबी गरिरहेको नेपाल लोकतान्त्रिक वैदेशिक रोजगार व्यवसायी एसोसिएसनको असन्तुष्ट पक्षले मंगलबार नेपाली कांग्रेसका सभापति तथा पूर्वप्रधानमन्त्री शेरबहादुर देउवालाई पार्टीको नीति स्पष्ट गरी संघको निर्वाचनका लागि प्रतिनिधि पठाउन माग गरेकोे छ ।
बूढानीलकण्ठस्थित निवासमा सभापति देउवालाई भेटेको सो पक्षले माओवादीसँग हाललाई सहकार्य नगर्ने पार्टीको नीतिविपरीत पार्टीका उपसभापति र केही नेताहरूलाई उपस्थित गराएर नेकपा (माओवादी केन्द्र) निकट वैदेशिक रोजगार व्यवसायी गणतान्त्रिक मञ्चसँग तालमेल गरिएको भन्दै आधिकारिक दृष्टिकोण सार्वजनिक हुनुपर्ने माग गरेको छ ।
व्यवसायीसँगको छलफलपछि सभापति देउवाले स्वकीय सचिव भानु देउवामार्फत उपसभापति पूर्णबहादुर खड्का र गृहमन्त्री रमेश लेखकलाई फोन गरी समस्याको समाधानका लागि निर्देशन दिएका थिए ।
उपसभापति खड्का आफू बिरामी रहेकाले केही अपडेट नरहेको बताएपछि असन्तुष्ट खेमाको नेतृत्व गरेका पूर्वअध्यक्ष विमलप्रसाद ढकाल, प्रज्ञान न्यौपाने र कुमुद खनाललगायत करिब एक दर्जन व्यवसायीले दिउँसो गृहमन्त्री लेखकलाई भेटेका थिए । भेटमा गृहमन्त्री लेखकले सहमतिमा नेतृत्व चयन गर्ने समितिमा नै विगतको निर्वाचन रोकिएको भन्दै प्रगतिशील मञ्चसँग छलफल गरेर जान सुझाव दिएको एसोसिएसनका पूर्वअध्यक्ष न्यौपानेले मध्यान्ह दैनिकलाई जानकारी दिए ।
गृहमन्त्री लेखकले त्यस विषयमा एमाले स्थायी समिति सदस्य भानुभक्त ढकालसँग पनि छलफल गरेका बताएको छ । गृहमन्त्री लेखकको सुझावपछि एसोसिएसनका असन्तुष्ट पक्ष तथा मञ्चका संस्थापक अध्यक्ष सरोजकुमार पोखरेल र संघका अध्यक्ष राजेन्द्र भण्डारीबीच छलफल भएको बताइएको छ ।
उक्त छलफललगत्तै दुवै पक्षबीच मञ्चमा पूर्वअध्यक्ष नरेश गेलालको नेतृत्वमा लोकतान्त्रिकको असन्तुष्ट पक्षसँग तालमेल गर्ने चर्चा व्यापक बनेको छ । तर, त्यस विषयमा कुनै पक्षले आधिकारिक पुष्टि गरेका छैनन् ।
मञ्च प्यानलका महासचिवका उम्मेदवार तथा मञ्चका अध्यक्ष जनक रावलले त्यस विषयमा माथिल्लो राजनीतिक तहमा छलफल भए पनि व्यवसायीहरूबीच मंगलबार अबेरसम्म कुनै सहमति नबनेको र उक्त छलफल अप्रासंगिक भइसकेको बताए ।
एसोसिएसनका पूर्वअध्यक्ष खनालले सबै व्यवसायीलाई समेट्नेगरी विभिन्न संभावनाका बारेमा छलफल भइरहेको बताए । सहमति भएमा महासचिवमा हालका सचिव कर्णराज कटुवाल उम्मेदवार बन्ने कतिपयले बताएका छन् ।
* यस समाचारको शीर्षक पार्टीको नीति स्पष्ट गरी प्रतिनिधि पठाउन एसोसिएसनका असन्तुष्ट पक्षको माग हुनुपर्नेमा अन्यथा भएकाले सच्याइएको छ । यसबाट पाठकवर्गमा पर्न गएको असुविधाप्रति क्षमाप्रार्थी छौं । सं.
