काठमाडौं : पुरुषोत्तम बजगाईं आफ्नो पहिलो कृति ‘नीलो प्रेम’ उपन्यास लिएर आएका छन् । काठमाडौंमा बुधबार उक्त कृतिको विमोचन गरिएको छ । स्रष्टा, समालोचक प्रा. डा. कृष्णहरि बराल, राजुबाबु श्रेष्ठ, घनेन्द्र ओझा, विश्व कीर्तिमानी संगीतकार सन्तोष श्रेष्ठ, लेखकका बुबा पं. उद्धव बजगाईं, लेखककी जीवनसाथी सुजाता चम्लागाईंलगायतले कृति विमोचन गरेका थिए ।

इन्डिगो इन्कले प्रकाशन गरेको ‘नीलो प्रेम’ विशेषगरी किशोर–किशोरीका प्रेममा केन्द्रित जस्तो देखिए पनि यसमा सामाजिक, सांस्कृतिक, आर्थिक पक्षको समेत मिहीन ढंगले उजागर भएको समीक्षक घनेन्द्र ओझाले बताए । उनले ‘नीलो प्रेम’ आदर्श प्रेमको पक्षमा देखिएको भन्दै यो उपन्यास विषयका हिसाबले सबै उमेर समूहका पाठकका लागि उत्तिकै उपयुक्त रहेको सुनाए ।

लेखक पुरुषोत्तम बजगाईंले आफूले देखे, सुनेका विषयलाई नै उपन्यासको रूप दिएको सुनाए । साहित्यकार राजुबाबु श्रेष्ठले आफूले कुनै समय अभिभावकत्व लिएका पुरुषोत्तमले यति सुन्दर कृति पढ्ने अवसर दिएकामा खुसी व्यक्त गरे ।

प्रा. डा. कृष्णहरि बरालले उपन्यास लेखनका विविध सैद्धान्तिक पक्षको चर्चा गर्दै ‘नीलो प्रेम’ले उपन्यासका सीमा र मान्यतालाई आत्मसात् गरेको बताए ।

इन्डिगो इन्कका प्रोप्राइटर विष्णुकुमार पौडेलको सभापतित्वमा सम्पन्न कार्यक्रमको सहजीकरण स्रष्टा ज्ञानु विद्रोहीले गरेका थिए ।