काठमाडौं : नेपाल वैदेशिक रोजगार व्यवसायी संघको आगामी २९ चैतमा हुने निर्वाचनका लागि प्रगतिशील वैदेशिक रोजगार व्यवसायी मञ्च नेपाल, नेपाल लोकतान्त्रिक वैदेशिक रोजगार व्यवसायी एसोसिएसनका सदस्यहरुको असन्तुष्ट पक्ष र एकीकृत वैदेशिक रोजगार व्यवसायी संगठनबीच तालमेलमा संयुक्त व्यवसायी समूह बनेको छ ।
सो समूहको अध्यक्षमा संघका पूर्वमहासचिव तथा मञ्चका पूर्वअध्यक्ष एचआर इन्टरनेसनल सर्भिस प्रा. लि.का संचालक नरेश गेलाल छन् । सो समूहले बुधबार पदाधिकारी र सदस्यसहित १७ सदस्यीय प्यानल सार्वजनिक गरेको छ ।
गेलाल नेतृत्वको प्यानलको प्रथम उपाध्यक्षमा एलायन्स ह्युमन रिसोर्स प्रा. लि.का संचालक सुजितकुमार श्रेष्ठ, द्वितीय उपाध्यक्षमा संगठनका महासचिव इम्प्लोइमेन्ट लिंक नेपाल प्रा. लि.का संचालक मधुकर रिजाल, तृतीय उपाध्यक्षमा न्यु अल्फा एचआर प्रा. लि.का संचालक बैकुण्ठ पौडेल वैभव, महासचिवमा वर्तमान सचिव डाइनामिक स्टाफिङ सोलुसन प्रा. लि.का संचालक कर्णराज कटुवाल, सचिवमा कन्फिडेन्ट इन्टरनेसनल म्यानपावर प्रा. लि.का संचालक अनिल बोगटी र कोषाध्यक्षमा कालिञ्चोक एचआर प्रा. लि.की संचालक धनु सिँजाली मगर छन् । बोगटी संगठनका सचिव हुन् ।
कार्यसमिति सदस्यका उम्मेदवारहरूमा माउन्टेन ग्रुप प्रा. लि.का संचालक देउमान नेम्बाङ, ग्रोथ प्रोसेस इन्टरनेसनल इम्प्लोइमेन्ट प्रा. लि.का संचालक राजेन्द्र बस्नेत, उज्यालो ओभरसिज प्रा. लि.का संचालक चन्द्र लिम्बू छन् । पौडेल, नेम्बाङ, बस्नेत र लिम्बू वर्तमान कार्यसमिति सदस्य पनि हुन् ।
कार्यसमिति सदस्यका अन्य उम्मेदवारहरूमा विनर एचआर सोलुसन प्रा. लि.की संचालक हिमा गुरुङ, रियो ओभरसिज प्रा. लि.की संचालक रमा खड्का, गल्फ इम्पायर ओभरसिज प्रा. लि.का संचालक दिनेश बस्नेत, आयुश ओभरसिज प्रा. लि.का संचालक कामेश्वर साह राहुल, सिगुल ओभरसिज प्रा. लि.का संचालक छत्र बस्नेत, डेस्टिनी ह्युमन रिसोर्स प्रा. लि.का संचालक युवराज देवकोटा र गल्फ एसिया म्यानपावर प्रा. लि.का संचालक राजेश यादव छन् ।
उम्मेदवारहरूलाई शुभकामना व्यक्त गर्दै संघका पूर्वअध्यक्ष विमल ढकालले लागू हुन सक्ने सबै प्रकारका सिन्डिकेटका विरुद्ध गेलाल समूह बनेको बताए । पूर्वअध्यक्ष ढकालले पार्टीको निर्देशनअनुसार वैदेशिक रोजगार व्यवसायी गणतान्त्रिक मञ्चसँग नभई प्रगतिशील वैदेशिक रोजगार व्यवसायी मञ्च नेपालसँग गठबन्धन गरिएको बताए ।
उम्मेदवार घोषणासभामा नेकपा एमालेका सचिव पूर्वमन्त्री योगेश भट्टराई, नेकपा (एकीकृत समाजवादी)का स्थायी समिति सदस्य तथा वैदेशिक रोजगार इन्चार्ज नागेन्द्र चौधरी, नेपाली कांग्रेसकी केन्द्रीय सदस्य सीता देवकोटालगायतले शुभकामना मन्तव्य राखेका थिए ।
उता, भुवनसिंह गुरुङको नेतृत्वमा नेपाल लोकतान्त्रिक वैदेशिक रोजगार व्यवसायी एसोसिएसन र नेपाल वैदेशिक रोजगार व्यवसायी गणतान्त्रिक मञ्चले घरदैलो र भेटघाट कार्यक्रम गर्दै प्रचारप्रसार सुरु गरिसकेका छन् ।
