काठमाडौं : वैदेशिक रोजगार विभागका महानिर्देशक सूर्यबहादुर खत्रीले मुलुकको अर्थतन्त्रलाई सेवा पु¥याएको वैदेशिक रोजगार व्यवसायीका समस्या समाधान गर्न विभागले सकारात्मक भूमिका खेल्ने बताएका छन् ।
नेपाल वैदेशिक रोजगार व्यवसायी एकता समितिले रक्तदान, क्यालेन्डर विमोचन तथा नववर्ष २०८२ का अवसरमा सामाखुसीमा आयोजना गरेको कार्यक्रमका प्रमुख अतिथि खत्रीले वैदेशिक रोजगार व्यवसायीले व्यवसाय संचालनका क्रममा औंल्याएका नीतिगत, कानुनी र व्यावहारिक समस्या संबोधन गरिने बताए ।
उनले रक्तदान जस्तो पवित्र काम गरेर समितिले सामाजिक उत्तरदायित्व पूरा गर्नुका साथै व्यवसायीको मान, प्रतिष्ठा, इज्जत बढाउन सहयोग गरेको उल्लेख गरे ।
महानिर्देशक खत्रीले वैदेशिक रोजगारमा ठगी भयो, विभागबाट न्याय पाइएन भनेर प्रचारप्रसार हुँदा विभाग दुखी हुने गरेको भन्दै व्यवसायी मर्यादित भए कामदार सुरक्षित भई व्यवसायीको प्रतिष्ठा बढ्ने पनि जिकिर गरे ।
वैदेशिक रोजगार व्यवसाय गर्ने इजाजतपत्र नलिएका व्यवसायी बाहिर रहेकोे पक्ष, शैक्षिक कन्सल्टेन्सी, ट्राभल्स एजेन्सी र बाटोघाटोमा ठग्ने र ठगिने प्रवृत्ति बढ्दो चुनौतीका रूपमा देखापरेका भन्दै महानिर्देशक खत्रीले व्यक्तिगत ठगीसम्बन्धी उजुरी जिल्लाबाट हेर्ने व्यवस्था गरेमा विभाग अन्य समस्या समाधानका लागि बढी प्रभावकारी हुने उल्लेख गरे ।
व्यवसायीहरूले वैदेशिक रोजगार ऐन संशोधन, मागपत्र प्रमाणीकरणलगायतका माग सम्बोधन गर्न पटक–पटक ध्यानाकर्षण गराएको भन्दै समस्या समाधानका लागि वैदेशिक रोजगार ऐन संशोधनका लागि श्रम, रोजगार तथा सामाजिक सुरक्षा मन्त्रालयले माग गरेअनुसार सुझाव पठाएको बताए ।
उनले भने, ‘हाल इजाजतपत्र नवीकरणका लागि वार्षिक सय जना कामदार पठाउनुपर्ने बाध्यता अन्त्य गर्न ३ वर्षमा सय जना कामदार पठाए पनि हुने सुझाव पठाएको छ ।’
कुनै व्यवसायी सामान्य रूपमा कर तिरेर आराम गर्छु भन्छ भने व्यवसायीलाई सुविधा दिनुपर्छ भन्ने मान्यतामा विभाग छ ।
महानिर्देशक खत्रीले मागपत्र प्रमाणीकरण समस्या पनि समाधान गर्न चाहने हो भने अवस्था सहज रहेकोे बताए । उनले भने, ‘वैदेशिक रोजगार ऐनमा कामदार समस्या परे फिर्ता गर्ने र करारअनुसारको सेवा, सुविधा दिलाउने जिम्मा दिइएको छ । व्यवसायी उत्तरदायी हुनेगरी मागपत्र प्रमाणीकरण गर्न सकिन्छ ।’
ठगीको प्रचारप्रसारले विभागलाई पीडा हुने भन्दै उनले त्यसैले यो क्षेत्र मर्यादित र सुरक्षित गर्नुपर्ने आवश्यकता औंल्याए । व्यक्तिगत ठगी सम्बन्धित जिल्लाबाट हेर्ने व्यवस्था गर्नुपर्ने, त्यसो गरेमा विभाग बढी प्रभावकारी हुने उनको भनाइ छ ।
नयाँ क्यालेन्डर प्रकाशन, रक्तदान जस्ता कार्यक्रम गरेकामा समितिलाई धन्यवाद दिँदै आफ्नो नेतृत्वको संघले भवन खरिद, संख्या सय समस्या समाधानको पहल, सेवा शुल्क परिमार्जनका लागि निरन्तर दबाब दिएर व्यवसायीको हितमा काम गरिरहेको संघका अध्यक्ष राजेन्द्र भण्डारीले बताए ।
अध्यक्ष भण्डारीले संसद्को हिउँदे अधिवेशनमा संख्या सय खारेजीको प्रावधान रहेकोे केही नेपाल ऐन संशोधन विधेयक पारित नभए पनि बजेट अधिवेशनको सुरुवातमै उक्त विधेयक पारित हुने वस्तुगत आधार तयार भएकाले सय संख्या नपुर्याएका व्यवसायीले इजाजतपत्र नवीकरण हुने/नहुने दुविधामा बस्नु नपर्ने दाबी गरे ।
संघका पूर्वअध्यक्ष रोहन गुरुङले वैदेशिक रोजगार व्यवसायीले सक्षम र व्यवसायीप्रति बफादार नेतृत्व चुन्नुपर्ने भन्दै हाल संघ नेतृत्वका लागि आएका आकांक्षीहरूले विगतमा खेलेका सकारात्मक र नकारात्मक दुवै पक्षको मूल्यांकन गरेर मतदान गर्न जरुरी रहेकोे बताए । उनले आफूले हालका केही उम्मेदवारहरूले विगतमा नियतवश व्यवसायी हक हितविपरीत गरेका कामहरूलाई क्रमशः सार्वजनिक गर्ने भन्दै विश्लेषण गरी मतदान गर्न आग्रह पनि गरे ।
संघको आगामी निर्वाचनमा नेपाल लोकतान्त्रिक वैदेशिक रोजगार व्यवसायी एसोसिएसनका उम्मेदवार भुवनसिंह गुरुङले निर्वाचनमा आफ्नो टिम विजयी गराएको खण्डमा सबै प्रकारका सिन्डिकेटका विरुद्व व्यवसायलाई मर्यादित बनाउने उद्देश्य लिएको बताए ।
सोही प्यानलका प्रथम उपाध्यक्षका उम्मेदवार तथा एसोसिएसनका पूर्वअध्यक्ष नरेन्द्रप्रसाद ढकालले वास्तविक पीडितबाट उजुरी लिएर छानबिन गर्ने व्यवस्था गर्न महानिर्देशक खत्रीको ध्यानाकर्षण गराउँदै व्यवसायीलाई बद्नाम गर्ने तत्त्वविरुद्ध व्यवसायी एकताबद्ध हुने बताए ।
समितिका सभापति हरिबहादुर पाण्डे क्षेत्रीले विभागले हाल प्रदान गरेका सेवाले व्यवसायीलाई केही सहज भएको भए पनि अनधिकृत व्यक्तिहरूबाट व्यवसायीमाथि ठगीको आरोप र लाञ्छना लगाउने प्रवृत्तिको अन्त्य गर्नेमा विभाग गम्भीर हुनुपर्ने माग गरे ।
पाण्डेले केही नेपाल ऐनलाई संशोधन गर्ने विधेयकमा संख्या सयको प्रावधान हटेको तर एउटा फाइलको सट्टामा कामदार संख्याको आधारमा जरिमाना लिने नयाँ व्यवस्था आएकोे भन्दै त्यसमा संघको कार्यसमिति व्यवसायीप्रति जबाफदेही रहेकोे बताए ।
मध्यान्ह दैनिकका सम्पादक मदनकुमार श्रेष्ठले शुभकामना मन्तव्य राख्दै रक्तदान जस्तो पवित्र काम गरेर समितिले समाजसेवी काम गरेकोे भन्दै भविष्यका दिनमा पनि विगतका जस्तै समाजसेवी कामलाई निरन्तरता दिन आग्रह गरे ।
कार्यक्रम संयोजक खड्कबहादुर केसी, भिजन एन्ड भ्याल्यु ओभरसिजका संचालक वरिष्ठ व्यवसायी पदमराज पौडल, संघका पूर्व द्वितीय उपाध्यक्ष किशोर केसी, नेपाल वैदेशिक रोजगार व्यवसायी महिला संघकी अध्यक्ष प्रतिमा महर्जन, वैदेशिक रोजगार व्यवसायी तमुधीः समाजका अध्यक्ष तीर्थबहादुर गुरुङलगायतको उपस्थिति थियो ।
महासचिव मधुकर रिजालले संचालन गरेको कार्यक्रममा उपाध्यक्ष हरिश कुँवरले स्वागत मन्तव्य राखेका थिए ।
