काठमाडौं : नेपाल वैदेशिक रोजगार व्यवसायी संघको आगामी निर्वाचनका लागि भुवनसिंह गुरुङ अध्यक्षको उम्मेद्वार रहेको लोकतान्त्रिक–गणतान्त्रिक समूहको पहिलो क्षेत्रीय भेला सम्पन्न भएको छ ।
राजधानीको तीनकुनेमा आयोजित क्षेत्रीय भेलालाई कार्यसमिति पदाधिकारी तथा सदस्य उम्मेदवारसहित मूल निर्वाचन परिचालन समितिका संयोजकलगायतले सम्बोधन गरेका थिए ।
सो समूहका अध्यक्षका उम्मेदवार संघका पूर्व द्वितीय उपाध्यक्ष तथा गुरुङ म्यानेजमेन्ट प्रा. लि.का संचालक भुवनसिंह गुरुङले वैदेशिक रोजगार क्षेत्रमा रहेका समस्या समाधानका लागि सरकारसँग छलफल र समन्वय गरेर समस्याको समाधानका लागि दिनरात खटिने प्रतिबद्धता व्यक्त गरे । उनले वैदेशिक रोजगार क्षेत्रमा रहेका नीतिगत तथा कानुनी समस्या समाधान र कुनै पनि आवरणमा हुने सिन्डिकेटको विरोधमा काम गर्ने पहिलो प्रतिबद्धता रहेको बताए ।
प्रथम उपाध्यक्षका उम्मेदवार नोकरी नेपाल प्रा. लि.का संचालक नरेन्द्रप्रसाद ढकालले सुधारका लागि अधिकतम प्रयास गर्ने समूहको लक्ष्य रहेको भन्दै व्यवसायीलाई घात गर्ने कुनै काम नगर्ने प्रतिबद्धता जनाए । उनले नेपाली दूतावासहरूमा मागपत्र प्रमाणीकरणका लागि पेस भएपछि प्राथमिकता सूचीका आधारमा प्रमाणीकरण हुने व्यवस्था स्थापित गर्ने, सिन्डिकेट अन्त्य र कमीकमजोरी हटाउन विज्ञ टोली गठन गरी कानुन हातमा लिने प्रवृत्तिलाई निरुत्साहित गर्ने प्रतिबद्धता जाहेर गरे ।
द्वितीय उपाध्यक्षका उम्मेदवार अलर्ट ओभरसिज प्रा. लि.का संचालक देव खोखालीले पीडितका नाममा हुने अराजकताको अन्त्य, व्यवसायी सुरक्षाका लागि काम गर्ने प्रतिबद्धता जनाए ।
तृतीय उपाध्यक्षका उम्मेदवार इम्प्लोइमेन्ट क्रियसन सर्भिस प्रा. लि.का संचालक हर्क लिम्बूले व्यवसायीको एकतामा जोड दिँदै इमान्दार र कर्तव्यनिष्ठ व्यवसायीलाई मत दिन आग्रह गरे ।
महासचिवका उम्मेदवार ग्लोबल राइजिङ प्लेसमेन्ट प्रा. लि.का संचालक महेशकुमार बस्नेतले व्यवसायीलाई पेसा टिकाउने अवस्था निर्माण गर्नु महत्त्वपूर्ण भन्दै वैदेशिक रोजगारलाई सेवा उद्योगका रूपमा विकास गर्न पहल गर्ने प्रतिबद्धता जनाए । उनले व्यवसाय र व्यवासयी शुद्धीकरण गरी सम्मानित बनाउने बिनाप्रमाणका उजुरी दर्ता रोक्न संयन्त्र बनाउन, व्यवसायीलाई अनावश्यक दुःख दिनेको पहिचानका लागि ब्ल्याक लिस्ट सफ्टवेयर ल्याएर विभागमा ३ जना कानुनी सल्लाहकार राखेर कानुनी रूपमा प्रतिवाद गर्नेलगायतका योजना तयार पारेको बताए ।
सचिव पदका उम्मेदवार आकृति रिक्रुटिङ प्रा. लि.का संचालक कुन्छा दोर्जे दिमदोङले व्यवसायीलाई समस्या र आर्थिक भार पार्नेगरी वैदेशिक रोजगार ऐनमा संशोधन गर्न लागिएको अवस्थामा त्यसलाई रोक्न संघको नेतृत्व बलियो र प्रभावकारी हुनुपर्नेमा जोड दिए ।
कोषाध्यक्षका उम्मेदवार शुभ हारती म्यानपावर प्रा. लि.का संचालक विक्रम श्रेष्ठले आर्थिक रूपमा संघलाई बलियो र पारदर्शी बनाई व्यवसायीको लेबीमा मात्र निर्भर नगराई अन्य स्रोतहरूको खोजी गर्ने बताए । कार्यक्रममा प्यानलका सदस्यका उम्मेदवारहरूले पनि आ–आफ्नो धारणा राख्दै प्रतिबद्धता जनाए ।
सो प्यानल कार्यसमिति सदस्यमा इम्पेरियल ओभरसिज प्रा. लि.की संचालक विद्यालक्ष्मी बज्राचार्य, राज ग्रुप अफ कम्पनीका संचालक राज लामा तामाङ, हिमालयन भ्याली नेपाल प्रा. लि.का संचालक देवीप्रसाद गिरी, ब्रदर इन्टरनेसनल इम्प्लोइमेन्ट प्रा. लि.का संचालक दीपककुमार राय, रसुवा ओभरसिज प्रा. लि.का संचालक सुवर्ण लामा, सेक्युर नेपाल जब प्रा. लि.का संचालक सुमनराज पाण्डे, ग्लोबल एचआर हब प्रा. लि.की संचालक गीता राउत र युनिक ओभरसिज प्रा. लि.की संचालक तिलरूपा दाहाल उम्मेदवार बनेका छन् ।
त्यस्तै, युनिभर्स एच.आर. सोलुसन प्रा. लि.का संचालक भरत सापकोटा, रिजा ओभरसिज प्रा. लि.की संचालक रेखा शर्मा र इगल म्यानपावर कन्सल्टेन्ट प्रा. लि.का संचालक कृष्ण ढकाल पनि सदस्यका उम्मेदवार बनेका छन् ।
कार्यक्रममा मूल निर्वाचन परिचालन समितिका संयोजक तिलकबहादुर रानाभाट, प्रचारप्रसार समितिका संयोजक किरणकिशोर घिमिरे, सहसंयोजक ओम न्यौपाने, शंकर तिवारीलगायतले समूहको उम्मेदवारीको औचित्यबारे धारणा राखेका थिए ।
एसोसिएसनका कार्यबाहक महासचिव तुलसी पुरीले संचालन गरेको कार्यक्रमको सहजीकरण क्षेत्रीय भेलाका संयोजक व्यवसायी शिवकुमार खड्काले गरेका थिए ।
