काठमाडौं : राष्ट्रिय स्वतन्त्र पार्टी (रास्वपा) ले शनिबार ‘जनयात्रा’ सुरु गरेको छ ।
केन्द्रीय समितिको बैठकको निर्णय अनुसार शनिबार चितवनबाट जनयात्रा कार्यक्रम सुरु भएको हो ।
उपसभापति, सांसद, केन्द्रीय सदस्य लगायतले भरतपुर–१० को गेष्ट हाउस चौरमा एकमुष्ट रूपमा जनयात्राको सुरुवात गरेका हुन् । उनीहरूले घण्टी बजाएर जनयात्रा शुभारम्भ भएको घोषणा गरेका छन् ।
जनयात्रामा सभापति रवि लामिछाने उपस्थित थिएन । शुक्रबार साँझ बुटवल उच्च अदालतको तुलसीपुर इजलासले लामिछानेलाई थुनामा पठाउने आदेश गरेसँगै उनी अहिले प्रहरीको हिरासतमा छन् ।
लामिछानेले पक्राउ पर्नुअघि कार्यक्रम नरोक्न निर्देशन गरेका थिए । लामिछानेले जनयात्राको सभामा आफू गृहमन्त्री भएको प्रचण्ड नेतृत्वको सरकार किन ढालियो भन्ने बारेमा खुलासा गर्ने पनि बताएका थिए ।
जनयात्रा शुभारम्भ कार्यक्रममा रास्वपाका कार्यवाहक महामन्त्री कवीन्द्र बुर्लाकोटीले सभापति लामिछानेको लडाइँ कानुनी मात्रै नभएर राजनीतिक लडाइ पनि भएको बताए ।
बुर्लाकोटीले भ्रष्ट र दलालतन्त्रको प्रसय गर्ने सरकारले अदालतको फैसलालाई टेकेर बदनियतका साथ रातारात पक्राउ गरेको दाबी गरे ।
उनले राजनीतिक लडाइँमा सबै मिलेर जित हासिल गरिने भन्दै हातमा हात मिलाएर एकताबद्ध भएर पार्टी अघि बढ्ने बताए ।
यस्तै, उपसभापति स्वर्णिम वाग्लेले पार्टी सभापति लामिछानेलाई दुनियाँकै ठूलो अपराधी जस्तो गरेर धरपकड गरेको आरोप लगाए ।
वाग्लेले जनयात्रामा सभापतिलाई बोल्नै नदिनका लागि शुक्रबार राति पक्राउ गरिएको दाबी गरे । उनले लामिछानेविरुद्ध आएको फैसला बहस सकिएको दुई घण्टामा लेखिसक्ने कुनै सम्भावना नभएकाले तानाबाना पहिल्यै बुनिएको देखिएको जिकिर गरे ।
