-सविता बिमली
बडो कठिन हुन्छ
कोही जाँदै गरेको हेर्न !
जन्माएर छोरी
जब अन्माउँछे आमा
हल्लाउँछ जब बाबुले
बिदाइको हात
त्यसपछिको सन्नाटामा
कति गुञ्जिँदा हुन्
उसका घुर्की, लाड, प्यार
रुवाइ, चकचक, बदमासी !
ठीक त्यस्तै
हरेक वर्ष
बिदा हुन्छन् केटाकेटी
विद्यालयको फाटकबाट !
आउनेहरूलाई
उस्तै स्नेह गरे पनि
छाडेर गएकाहरू
मनबाट कहिल्यै जाँदैनन् !
यस्तो माया आमाले गर्छे सायद !
यी यादमा कुनै बाबु हराउँदो हो !
म शिक्षक
उस्तै लाग्छ माया
उसैगरी दुख्छु सम्झनामा
बडो कठिन हुन्छ
कोही जाँदै गरेको हेर्न ।
.jpeg)
.jpg)
