-कुशलनाथ योगी
रंगीन हुने छ एक दिन, सादा हुँदैन हरदम
रङबाट जिन्दगानी, टाढा हुँदैन हरदम
लुट्ने रहर छ के–के, आजै लुटेर जाऊ
हेक्का रहोस् अधीनमा, सत्ता हुँदैन हरदम
बानी बसाल मेरा, आँखाहरू नियाल्ने
सुन्दर मुहार हेर्ने, ऐना हुँदैन हरदम
तिम्रो बनेको सपना, हररात देख्छु मैले
विपना हुने छ सपना, सपना हुँदैन हरदम
टेकिन्छ फूलमाथि, नांगा पयरहरूले
कुल्चेर हिँड्नुपर्ने, काँडा हुँदैन हरदम ।
