यामराज बिष्ट/मध्यान्ह
दैलेख : बाघ र रेडपाण्डाको छालासहित आठ जना पक्राउ परेका छन् । दैलेख प्रहरीले नारायण नगरपालिका–३, खुर्सानीबारीबाट आठ जनालाई शनिबार नियन्त्रणमा लिएको हो । गोप्य सूचनाको आधारमा उनीहरुलाई नियन्त्रणमा लिएको प्रहरीले जानकारी दिएको छ । कर्णाली प्रदेश ०२– ००१ ज ००३६ नम्बरको डबल क्याप बोलेरो जीपमा नौमुले–२ बाट दैलेख सदरमुकामतर्फ आउँदै गर्दा उनीहरुलाई प्रहरीले पक्राउ गरेको हो ।
पक्राउ पर्नेमा नौमुले गाउँपालिका–३ का ५१ वर्षीय धनबहादुर मगर, २२ वर्षीय दलबहादुर खत्री, सोही गाउँपालिका वडा नम्बर १ का ३३ वर्षीय कविराम अधिकारी, वडा नम्बर २ का ३३ वर्षीय धनबहादुर पुरी, ४५ वर्षीय हस्तबहादुर थापा, ५६ वर्षीय धनबहादुर रावत, वडा नम्बर ४ का १९ वर्षीय रोशन बस्नेत र भगवतीमाई गाउँपालिका–१ का २७ वर्षीय गोविन्द थापा रहेका छन् ।
उनीहरू ३ फिट ३ इन्च लम्बाइ र ११ इन्च चौडाइ भएको रातो कालो रङको रेडपाण्डाको छाला, ५ फिट ९ इन्च लम्बाइ र १ फिट ५ इन्च चौडाइ भएको चितुवा जस्तो छाला देखिने रातो सेतो कालो बुट्टेदारसहित पक्राउ परेको प्रहरीले जनाएको छ ।
यस्तै, उनीहरुबाट रेडपाण्डाको जस्तो देखिने ३ फिट लम्बाइ र १ फिट ६ इन्च गोलाइ भएको छाला र ३ फिट १ इन्च गोलाइ भएको रेडपाण्डाको जस्तो देखिने सिलाएको छाला पनि बरामद गरिएको जिल्ला प्रहरी कार्यालय दैलेखका प्रहरी निरीक्षक इन्द्रजित सुनारले जानकारी दिए । उनीहरुलाई नियन्त्रणमा लिई उनीहरुमाथि थप अनुसन्धान भइरहेको प्रहरी निरीक्षक सुनारले बताए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies