रौतहट : रौतहटको यमुनामाई गाँउपालिकामा तीन दिनदेखि बेपत्ता एक बालिकाको शव फेला परेको छ । यमुनामाई गाँउपालिकाको वडा नं. ४ मा रहेको झाँझ खोलमा अन्दाजी १५ वर्षीया बालिकाको शव फेला परेको बडहर्वा प्रहरी चौकीले जनाएको छ ।
सोमबार बिहान स्थानीयले खोलामा बालिकाको शव देखेपछि सुरक्षाकर्मीलाई खबर गरेका थिए । मृतक बालिका रौतहटको माधवनारायण नगरपालिका वडा नं ५ का होरिल बैठाकी १५ वर्षीया छोरी फूलमन्ती कुमारी बैठा रहेको प्रहरीले जनाएको छ । उनको शव पोष्टमार्टमका लागि प्रादेशिक अस्पताल गौरमा पठाइएको प्रहरीले जनाएको छ ।
यता सोमबार बिहानै रौतहटको गरुडा नगरपालिका ५ मह्मदपुरका २२ वर्षीय अनिल यादव घर नजिकैको पोखरीमा डुबेको भन्ने खबर प्राप्त भएपछि सशस्त्र प्रहरी बल, नेपाल नं. ११ गणबाट खटिएको टोलीले उनको खोजी कार्य गरिरहेको छ ।
छारे रोगका बिरामी रहेका यादव बिहान शौचालय गर्न नजिकैको तलाउतर्फ गएको र सो तलाउको किनारमा उनले लगाएको गम्छा भेटिएकाले उनी तलाउमा डुबेको हुन सक्ने आशंकामा प्रहरीले खोजी गरिरहेको हो ।
यसैगरी आइतबार माधवनारायण नगरपालिकाको वडा नं. ९ गढौस्थित बाग्मती नदीको किनारमा नाम वतन नखुलेको अन्दाजी ५३ वर्षीय एक पुरुषको शव फेला परेको थियो ।
