राजनीतिलाई बिचारले डोर्याउने काम गर्ने भएकाले पद र प्रलोभनका अघि यो विषय गौण हुनुपर्ने हो । तर, नेपाली राजनीतिको चरित्र भने त्यस्तो पाइँदैन । पछिल्लो समय राजनीतिक समिकरण भनेकै पद र प्रलोभनका पर्यायवाची शब्द जस्तै बनेका छन् । लोकतन्त्रमा राजनीतिक समिकरण अंकबाट चल्ने र मिल्ने भएकाले त्यसका लागि दलहरुले ठूलै जोड घटाउ गरेर बसेका हुन्छन् । अहिले तत्कालिन नेकपा पार्टी सर्वोच्च अदालतको फैसलापछि पूर्व एमाले र पूर्व माओवादी केन्द्रमा परिवर्तन भएसँगै राजनीतिक समिकरणहरुका चर्चा एकदमै बढेका छन् । नयाँ सरकार गठन गर्नका लागि दलहरुले आफूसँग गरेको संसदीय अंक गणितमा निकै जोड पनि दिएका छन् ।
अहिले नेपाली राजनीतिमा अनौठा तरंगहरु देखा पर्दा पद र प्रलोभनकै कारण विचार र संगठनहरु विचलित हुने खतराहरु बढ्दै गएका छन् । अझ भनौं सत्ताको नजिक रहन र त्यसका लाभ लिइरहनका लागि राजनीतिक नेतृत्वले आफ्ना एजेण्डाहरु विर्सिएर रातारात आफूलाई परिवर्तन गरेको पाइन्छ । जसका कारण स्थिर भनिएको सरकार पनि धरमरको अवस्थामा छ भने परिवर्तनका लागि जनताले गरेको संघर्ष र बलिदानीको पनि अबमूल्यन भएको छ ।
नेकपा एमाले र नेकपा माओवादी केन्द्र फरक फरक परिवेशबाट आएका दलहरु एकीकरण भएर नेकपा बन्दा पनि उनीहरुको निहित स्वार्थ र नेतृत्वको टकरावले गर्दा सरकारको नेतृत्व गर्दा पनि प्रभावकारी देखिएको थिएन भने पछिल्लो समय अदालतको फैसालसँगै आफ्नै पूर्ववत अवस्थामा फर्कदा झनै यसले राजनीतिक तरलता निम्त्याएको छ ।
अहिले पनि एउटा पक्ष जसरी हुन्छ सरकारमा टिकि रहने प्रयासमा रहेको छ भने अर्को पक्ष जसरी हुन्छ नयाँ सरकार गठन गर्ने कुरामा लागि रहेको देखिन्छ । नेपाली राजनीतिमा जनताका मुद्दामा भन्दा पनि आफ्नै पार्टीका नाम, मान र पदका लागि मात्रै नेतृत्व लाग्नु दूर्भाग्यपूर्ण अवस्था हो ।
अहिले नेकपा माओवादी केन्द्रले आफ्नो पार्टीबाट निर्वाचित भएका चार जना सांसदहरुको पद निलम्बन भएसँगै मन्त्री पद पनि गुमेको छ । टोपबहादुर रायमाझी, लेखराज भट्ट, गौरिशंकर चौधरी, प्रभु साहको मन्त्री पद पनि गुमेको भएपनि उनीहरु पार्टी टुक्रिदा प्रधानमन्त्री केपी ओलीलाई साथ दिएकाले उनीहरुले पुनः मन्त्रीमा नियुक्ति त पाउलान तर यसले जनताको जनजीविकाको सवालमा कुनै पनि प्रभाव पार्ने छैन । जवसम्म नेपाली राजनीति इमानमा चल्दैन सरकार परिवर्तन, मन्त्री पदबाट हटेका र पुनः नियुक्ति भएका कुराहरु हामीले सुन्न र भोग्नु पर्ने विडम्बना कायमै रहने छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies