तेजबहादुर बन/मध्यान्ह
इटहरी : सुनसरीको इटहरीमा एक वर्षको अवधिमा २ सय ७८ अपराधका घटना घटेका छन् । इलाका प्रहरी कार्यालय इटहरीका अनुसार गत २०७७ वैशाखदेखि २०७७ चैत्र मसान्त सम्मको अपराध विवरण हेर्दा उक्त संख्यामा अपराधका घटना घटेको हो । उक्त अवधिमा इटहरी भित्र धेरैजसो ठगी तथा बैंकिङ कसुरका मुद्दा बढि देखिएको पाइएको छ । एक वर्षको अवधिमा इटहरीभित्र २५ वटा ठगीका घटना भएका छन् । जसमा बैंकिङ कसुरका मात्रै १७ वटा र ठगीका ८ वटा उजुरी परेका छन् । ठगीमा संलग्न सबैलाई नियन्त्रणमा लिइ कानून अनुसार कारबाही प्रक्रिया चलाइएको इलाका प्रहरी कार्यालय इटहरीले जनाएको छ ।
त्यस्तै इटहरीमा पछिल्लो समय लागूऔषध नियन्त्रणका घटना प्रहरीका लागि मुख्य चुनौती बनेको पाइएको छ । गएको २०७७ बैशाखदेखि चैत्र मसान्त सम्मको विवरण हेर्ने हो भने इटहरीमा २० वटा लागूऔषध सम्बन्धिका घटना भएको छ ।
जसमा २८ भन्दा बढिलाई नियन्त्रणमा लिइ कानून अनुसार कारबाही गरिसकेको इटहरी प्रहरीले जनाएको छ । लागूऔषध नियन्त्रणका घटनामा प्रहरीलाई यो वर्ष कम सफलता मिलेको जनाइएको छ । गत वर्ष लागू औषध सम्बन्धी ३४ वटा उजुरी रहेको थियो ।
त्यसैगरी इटहरीभित्र गएको एक वर्षमा जबरजस्ती करणीका घटना गत वर्षको तुलनामा बढेको पाइएको छ । गत २०६६÷७७ मा बलात्कार सम्बन्धी जम्मा १९ वटा उजुरी परेको थियो भने यो वर्ष २५ वटा उजुरी दर्ता भएको देखिएको छ । त्यस्तै इटहरीमा ज्यान मार्ने सम्बन्धिका घटना बढेको पाइएको छ ।
अघिल्लो वर्ष सोहि प्रकारका ४२ वटा घटना भएका थिए । इलाका प्रहरी कार्यालय इटहरीका अनुसार गत २०७७ वैशाखदेखि ७७ को चैत्र मसान्त सम्ममा कर्तब्य ज्यान सम्बन्धी १, ज्यान मार्ने उद्योगमा १२, ज्यान सम्बन्धी २, भवितब्य ज्यान सम्बन्धी १७, बेवारिसे ज्यान, ७ आगो लगाएर १, झुण्डिएर १८, करेण्ट लागेर र पानीमा हाम फालेर १÷१ गरी २ जनाको ज्यान गएको प्रहरी विवरणमा उल्लेख गरिएको छ । त्यस्तै इटहरीमा अघिल्लो वर्ष डाँका तथा चोरीका मात्रै २४ वटा घटना भएको देखिएको छ ।
जसमा २९ जनालाई नियन्त्रणमा लिइ आवश्यक कानूनी कारबाही गरिसकेको प्रहरीले जनाएको छ । त्यस्तै सवारी दुर्घटनामा परी ८ जनाले ज्यान गुमाएको र एक सवारी साधन पुर्ण रूपमा क्षति पुगेको प्रहरी विवरणमा उल्लेख छ । सबै घटना क्रमलाई मध्यनजर गर्दै प्रहरीले सामाजिक सुरक्षाप्रति उत्तरदायी बन्दै अपराध नियन्त्रणमा सफलता प्राप्त गरेको इलाका प्रहरी कार्यालय इटहरीका सूचना अधिकारी तथा प्रहरी निरीक्षक केश कटुवालले बताए ।
उनका अनुसार इटहरीमा पछिल्लो समय ठगी मुद्धाका घटना बढेको र लागूऔषध नियन्त्रणमा हदैसम्म सफलता पाएपनि यो प्रहरीकालागि मुख्य चुनौती बनेको बताए । उनले सिमा नाकाहरूमा जति कडाइ गरेपनि इटहरी र धरान लागूऔषधको ट्रान्जिट बनिसकेको जानकारी दिए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies