काठमाडौं : त्रिकोणात्मक टी-२० क्रिकेट सिरिजमा नेपालले मलेसियाविरुद्ध सानदार जित हात पारेको छ । कीर्तिपुरस्थित टीयू अन्तर्राष्ट्रिय क्रिकेट मैदानमा भएको खेलमा नेपालले मलेसियालाई ९ विकेटले पराजित गरेको छ । यसअघि नेपाल नेदरल्याण्ड्सविरुद्ध पनि ९ विकेटको विजयी भएको थियो ।
टस हारेर ब्याटिङको निम्तो पाएको मलेसिया १६ ओभर पाँच बलमा एक सय नौ रनमा अलआउट भयो । राम्रो सुरुवात गर्न नसकेको मलेसियाले १७ रन हुँदा पहिलो विकेट गुमायो । उसका अनवर अरुदीलाई करण केसीले आठ रनमा आउट गरे । त्यसपछि मलेसियाको स्कोर ३४ रन हुँदा दोस्रो विकेट गयो । कप्तान अहमद फेइज मात्र तीन रनमा पेभेलियन फर्किए ।
त्यसपछि सोमपाल कामीले भिरन्दिप सिंहलाई मात्र ६ रनमा बोल्ड गरेपछि मलेसियाले ४५ रनमा तेस्रो विकेट खेर फाल्यो । लगत्तै सेइद अजिजलाई दिपेन्द्रसिंह ऐरीले २७ रनमा आउट गरेपछि मलेसियाले ५१ रनमा चौथो विकेट गुमायो ।
मलेसियाले ६८ रन बनाउँदा पाँचौं विकेट गुमायो । उसका सफिक सरिफलाई सन्दिप लामिछानेले १५ रनमा पेभेलियन फर्काए । लगत्तै अनिमुदिन राम्लेपनि ब्यक्तिगत पाँच रनमा आउट भएपछि नेपालले छैटौं विकेट लियो ।
मलेसियाले ९२ रन बनाउँदा सातौं विकेट गुमायो । उसका खिजार हायातलाई कुशल मल्लले चार रनमा आउट गरे । लगत्तै सेजरुल इर्जुसलाई करणले आठ रनमा पेभेलियन फर्काए । जसका कारण मलेसियाले एक सय एक रनमा आठौं विकेट खेर फाल्यो । लगत्तै सरभिन मुनीडेलाई करण केसीले २० रनमा कुशल भुर्तेलको हातबाट क्याच आउट गरए । जसका कारण एक सय ६ रनमा मलेसियाले नौ विकेट गुमायो ।
अन्तिममा मलेसिया एक सय नौ रनमा अलआउट भयो । बलिङमा करण केसीले तीन विकेट लिए भने सन्दिप लामिछानेले दुई तथा सोमपाल कामी, दिपेन्द्रसिंह ऐरी, साहब आलम, कुशल मल्लले एक एक विकेट लिए ।
जवाफमा नेपालले १२ ओभर एक बलमा विना विकेटको क्षतीमा लक्ष्य पुरा गर्यो । नेपालका ओपनर कुशल भुर्तेल र आशिफ शेखको जोडी मलेसियाविरुद्ध पनि उत्कृष्ट लयमा देखियो । टी २० क्रिकेटमा लगातार दुई खेलमा कुनैपनि नेपाली ओपनरले शतकीय साझेदारी गरेको यो पहिलो पटक हो ।
नेदरल्याण्ड्सविरुद्धको खेलमा एक सय १६ रनको साझेदारी गर्दै कीर्तिमान बनाएका कुशल र आशिफले मलेसियाविरुद्ध पनि आत्मविश्वासले भरिएको ब्याटिङ गरे । जसमा उनीहरुले एक सय दुई रनको साझेदारी गरे । जसमा आशिफले २९ बलमा चार चौका र एक छक्काको मद्दतले ४२ रन बनाए । यस्तै कुशलले ६१ रनको योगदान गरे ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies