देवेन्द्र आलोक/मध्यान्ह
विराटनगर : अस्पतालले भर्ना नगरेपछि उपचार नपाउँदा विराटनगरमा एकजना कोरोना संक्रमित (एन्टिजेन पोजेटिभ देखिएकी) महिलाको मृत्यु भएको छ । एन्टिजेन परीक्षणका क्रममा कोरोना संक्रमणको संकेत देखिएकी महिलाको उपचार नपाउँदा सोमबार मृत्यु भएको हो ।
उदयपुरको गाइघाटकी ३५ वर्षीया जैनव खातुनलाई सोमबार बिहान ३ बजेतिर विराटनगरको गोल्डेन अस्पताल पु¥याएका थिए । अस्पालले एन्टिजेन परीक्षण गर्दा उनमा कोरोना संक्रमणको संकेत (एन्जिजेटन पोजेटिभ) देखियो ।
कोरोना संक्रमणको एन्टिजेन पोजेटिभ देखिएपछि गोल्डेन अस्पतालले उनलाई भर्ना लिन मानेन् । आफूहरुले कोरोना संक्रमित बिरामीको उपचार गर्न नसक्ने भन्दै अस्पतालले जैनवलाई भर्ना गर्न मानेन् ।
त्यसपछि उनलाई विराट मेडिकल पुर्याइयो । तर, विराटले पनि जैनवलाई भर्ना गर्न मानेन । ‘बिरामीको अवस्था गम्भीर थियो, गोल्डेनले भर्ना नगरेपछि विराट मेडिकल कलेज लग्यौँ,’ जैनवलाई विराटनगर ल्याएको एम्बुलेन्सका चालक राजा मियाँले भने, ‘विराटले पनि कोभिड बिरामीलाई भर्ना गर्न मानेन, त्यहाँबाट म्याक्स अस्पतालमा सम्पर्क गर्दा बिरामी नल्याउन भन्यो ।’
म्याक्सले नल्याउन भनेपछि बिरामीलाई आफन्तले कोसी अस्पतालमा भर्ना गराए । कोसी आइपुग्दा करिब ४ बजेको थियो । कोसी अस्पतालले जैनवलाई सिधै आइसोलेसनमा राख्यो । तर, उपचार शुरु गरेन ।
कोसी अस्पतालले आइसोलेसनमा मात्रै राख्ने, उपचार नगर्ने भएपछि आफन्तहरुले उनलाई नोबेल मेडिकल कलेज (शिक्षण अस्पताल) पुर्याए ।
एन्टिजेन पोजेटिभ केस भएको जानकारी पाएपछि नोबेलले पनि भर्ना गर्न मानेन । कोरोना संक्रमणको एन्टिजेन पोजेटिभ केस भएको भन्दै नोबेलले पनि जैनवलाई भर्ना गर्न मानेन ।
नोबेलले भर्ना नगरेपछि आफन्तले जैनवलाई पुनः कोसी अस्पतालमा नै ल्याए । कोसीमा ल्याएको केही समयपछि बिहान करिब साढे ६ बजे जैनवको मृत्यु भएको अस्पतालका मेडिकल सुपरिटेन्डेन्ट डाक्टर चुमनलाल दासले जानकारी दिए ।
‘उहाँको एन्टिजेन पोजेटिभ हो, पीसीआर भएको थिएन,’ उनले भने, ‘अक्सिजनको लेभल पनि निकै कम थियो ।’ बिरामीको मृत्यु भएपछि आफन्तले शव घर लिएर गएका छन् ।
श्वासप्रश्वासमा समस्या भएकी महिलालाई उदयपुरबाट विराटनगरसम्म आइपुग्दा दुई सिलिन्डर अक्सिजन सकिएको थियो । तर, विराटनगरका अस्पतालले भर्ना गर्न मानेनन् । कोसी अस्पतालमा पनि प्रभावकारी उपचार नहुँदा बिरामीको मृत्यु भएको आफन्तले गुनासो गरे ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies