अर्जुन बिष्ट/मध्यान्ह
रुकुम पश्चिम : कोरोना भाइरसको संक्रमणका कारण रुकुम पश्चिमका एक महिलाको मृत्यु भएको छ । सोमबार बिहान जिल्ला अस्पताल सल्ले स्थित मुसिकोट नगरपालिका वडा नम्वर ७ की ४० वर्षीया एक महिलाको कोरोना संक्रमणका कारण मृत्यु भएको हो ।
उच्च ज्वरो आएको र श्वासप्रश्वासमा गाह्रो भएपछि गत शनिबार अस्पताल भर्ना भएकी उनी सोमबार बिहान ज्वरो बढेर बेहोस भएपछि मृृत्यु भएको जिल्ला स्वास्थ्य सेवा कार्यालय रुकुम पश्चिमका कोरोना रोग नियन्त्रण फोकल पर्सन इश्वर रावलले जानकारी दिए । मृतक महिला एक हप्ता अघि भारतबाट आएकी हुन् ।
जिल्लाको त्रिवेणी गाउँपालिकामा सोमबार दुई जनामा कोरोना संक्रमण पुष्टि भएको छ । संक्रमित हुनेहरुमा सोही स्थानका एक पुरुष र एक महिला रहेका छन् ।
त्यस्तै जिल्लामा कोरोना संक्रमणको जोखिम बढ्नेसक्ने भन्दै जिल्ला प्रशासन कार्यालयले जिल्लाका सबै सिमानाकामा हेल्थडेस्क राख्ने र सबै स्थानीय तहमा क्वारीन्टीन र आइसोलेसन तयार राख्न अनुरोध गरेको छ ।
जिल्ला विपद् व्यवस्थापन समितिको सोमबार बसेको बैठकले पछिल्लो समय नेपालमा कोरोना संक्रमण बढ्दै गएकोले उच्च सतर्कता र सावधानी अपनाउनुपर्ने भन्दै यस्तो निर्णय गरेको हो ।
कोरोना संक्रमणको जोखिम बढेकोले स्वास्थ्य मापदण्डअनुरूप चल्न र जिल्लामा कुनैपनी मेला, महोत्सव, सभा सम्मेलन, भेला र भिडभाड नगर्न प्रशासनले अनुरोध समेत गरेको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies