सरकारले सोमवार कोभिड संक्रमण रोकथाम गर्न कडाइ गर्ने निर्णय गरेको छ । स्वास्थ्य तथा जनसंख्या मन्त्रालयको सिफारिसमा मन्त्रिपरिषद् बैठकबाट संक्रमण रोकथामका लागि कडाइ गर्ने निर्णय गरेको हो । त्यसअगाडि नै १४ जिल्लालाई अति प्रभावित जिल्ला वर्गीकरण गरी कडाइ गर्ने निर्णय गरेको थियो । त्यही निर्णयअनुसार, बढी संक्रमण हुने जिल्लाहरुमा शैक्षिक संस्था वैशाखभर बन्द गर्ने निर्णय पनि गरिएको छ । सँगै, भीडजन्य गतिविधिमा रोक लगाइएको छ । २५ जना भन्दा बढी जम्मा नहुने पनि निर्देशन दिइएको छ । राजधानी उपत्यकामा लगातार संक्रमण बढे पछि रात्रिकालीन व्यवसाय, होटल व्यवसाय देखि सभा सम्मेलनमा पनि रोक लगाइएको छ । मास्क अनिवार्य लगाउन र उच्च सतर्कता अपनाउन आग्रह पनि गरिएको छ ।
तर, कडाइ गर्ने र सावधानी अपनाउन आग्रह गर्ने (प्रधानमन्त्री केपी शर्मा ओली) बाटै सरकारकै निर्णय पालना भएको देखिन्न । बुधवार मात्रै प्रधानमन्त्री ओलीकै चाहनामा बालुवाटारबाट चितवनको माडी लगेर राम मन्दिर स्थापना गरिएको छ । त्यसका लागि प्रधानमन्त्रीको निवास बालुवाटारमै निर्माण गरिएको राम, सीता, लक्षमण र हनुमानको मूर्ती चितवन लगिएको थियो । त्यहाँ मूर्ति स्थापना गर्न सभाकै आयोजना गरियो । यता, काठमाडौंमा प्रधानमन्त्री ओली नेतृत्वको नेकपा एमालेको महाधिवेशन आयोजक कमिटीको बैठक नै राखिएको छ । यो बैठकले कोरोना महामारीबारे कुनै छलफल गरेन । बरु, झण्डै पन्ध्र सय भन्दा बढी सहभागी हुने राष्ट्रिय परिषद्को बैठक बोलाइएको छ । यही कोरोनाकै बीच धरहरा उद्घाटनको कार्यक्रम राखिएको छ । आफैद्वारा सिर्जित संकटका कारण उत्पन्न राजनैतिक अस्थिरताका कारण भेला, छलफल जस्ता कार्यक्रम रोकिएको छैन ।
यसले स्वयम् प्रधानमन्त्रीले सरकारकै निर्णय अवज्ञा गर्ने मात्रै नभएर महामारीलाई निम्तो समेत दिएको अर्थमा टिप्पणी गरिएको छ । आम नागरिकलाई जस्तो अपिल गरिएको छ, त्यसको उदाहरण प्रस्तुत गर्नुपर्ने सरकार प्रमुखले हो । तर, त्यसो नगरेर सरकारलाई चाहिँ सबै कुरामा छुट छ, जनता मात्रै निर्णय कार्यान्वयनमा बाध्यकारी छन् भन्ने सन्देश गएको छ । यसले सरकारको गैरजिम्मेवारपन मात्रै नभएर मानवीय, आर्थिक, सामाजिक संकट निम्ताउने कोरोना महामारी रोकथाम हुन सक्दैन । अतः समाजलाई अनुशासित बनाउने र महामारी नियन्त्रण गर्न पनि सरकार प्रमुखबाटै सरकारी निर्णय पालना गर्न जरुरी छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies