काठमाडौं : प्रगतिशील वैदेशिक रोजगार व्यवसायी मञ्च नेपालले वैदेशिक रोजगारका क्षेत्रमा तत्काल सुधार गर्नुपर्ने विषयमा वैदेशिक रोजगार विभागका महानिर्देशक कृष्ण प्रसाद दवाडीको ध्यानाकर्षण गराएको छ । मञ्चका कार्यवाहक अध्यक्ष राजेन्द्र भण्डरीको नेतृत्वमा मंगलबार गएको एक प्रतिनिधिमण्डलले विभागका महानिर्देशक दवाडीलाई भेटेर कार्यकालको शुभकामनासहित वैदेशिक रोजगारका क्षेत्रमा लामो समयदेखि समाधान हुन नसकेका समस्याहरुमा ध्यानाकर्षण गर्दै समाधानको आग्रह गरेको हो ।
मञ्चका कार्यवाहक अध्यक्ष भण्डारीले व्यवसायीको ईजाजतपत्र नवीकरणका लागि वार्षिक एक सय जना कामदार अनिवार्यरुपमा वैदेशिक रोजगारमा पठाउनुपर्ने वैदेशिक रोजगार ऐन र नियमावलीले गरेको व्यवस्थाले व्यवसायीहरुलाई निराश बनाएको भन्दै त्यसको निकासाका लागि महानिर्देशकका तर्फबाट हुनसक्ने पहलका लागि आग्रह गरे ।
यसका अतिरिक्त मञ्चले साउदी अरबस्थित नेपाली दूतावासले नेपाली कामदारका लागि पेश भएका मागपत्र प्रमाणीकरणमा गरेको ढिलाईले पारेको समस्याको अविलम्ब समाधान हुनुपर्ने माग राखेको छ ।
भेटका अवसरमा मञ्चका पूर्व अध्यक्ष टंक बहादुर राउतले सरकारले कोरोना भाइरस नियन्त्रण गर्न बिहीबारदेखि जारी गरेकोे निषेधाज्ञाको सन्दर्भमा विभागको श्रम स्वीकृतिको सकेसम्म पूर्ववतः सहजीकरण गर्न माग गरे ।
उनले गैर नेपाली खास गरी वैदेशिक रोजगारीमा जाने भारतीय नागरिकहरुले त्रिभुवन अन्तर्राष्ट्रिय विमानस्थललाई ट्रान्जिट बनाउँदा नेपाली कामदारको हवाई टिकट अस्वभाविक रुपमा महंगिएकोदेखि कतिपय युरोपियन मुलुकहरुका नेपाली दूतावास नभएको र भएका मुलुकहरूस्थित दुतावासबाट पनि मागपत्र प्रमाणीकरण नभएकोले लामो समयदेखि समस्या रहेको विषयमा महानिर्देशक दवाडीको ध्यानाकर्षण गराए । साथै उनले हालै नक्कली पीसीआर रिपोर्टका कारण डिपोर्टेड कामदारको कोटा खाली नहुँदा समस्या रहेकोले समाधानको मागसमेत गरेका थिए ।
मञ्चका सचिव नवराज लुईटेल र सदस्य सोम तामाङले वैदेशिक रोजगार सूचना व्यवस्थापन प्रणाली (फेमिस) झन्झटिलो विज्ञापन प्रणाली रहेको भन्दै त्यसलाई समयानुकुल बनाउनुपर्नेमा जोड दिए । त्यस्तै मञ्चका सदस्य लक्ष्मण विश्वले पनि साउदी अरबको मागपत्र प्रमाणीकरण झन्झटिलो भएको विषयमा ध्यानाकर्षण गराए ।
मञ्चका महासचिव डिक बहादुर खत्री (कुमार)ले कार्यक्रम सञ्चालन गर्दै करोडौं रुपैयाँ धरौटी मार्फत लगानी गरी बेरोजगार युवायुवतीहरुलाई रोजगारी उपलब्ध गराई देशको बेरोजगार समस्या समाधान गर्न वैदेशिक रोजगार व्यवसायीहरुले योगदान गरिरहेको भएपनि समस्या समाधान गर्ने विषयमा प्रशासनिक पक्ष तत्पर नहुँदा व्यवसायीहरु समस्यामा रहेको भन्दै विभागमा अनुभवी प्रशासक नेतृत्वमा आएको अवस्थामा समस्या समाधानमा ढिलाई गर्न नहुनेमा महानिर्देशक दवाडीको ध्यानाकर्षण गराएका थिए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies