काठमाडौं : नेकपा एमालेका प्रमुख सचेतक महेश बर्तौलाले संसद अवरोध गरेर जनताका मुद्दाबाट पन्छिने राष्ट्रिय स्वतन्त्र पार्टीको कार्यशैलीमा अड्किएर बस्न नसक्ने बताएका छन् ।
सभामुख देवराज घिमिरेले बोलाएको प्रमुख सचेतकहरुसँगको छलफलपछि सञ्चारकर्मीहरुसँग कुरा गर्दै उनले यस्तो बताएका हुन् । उनले संसदलाई लामो समय अनिर्णयको बन्दी बनाउन नसकिने भन्दै रास्वपाले जनताका मुद्दा संसदमा राख्न नदिने काम गरिरहेको बताए ।
उनले संसद आजबाट आफ्नो नियमावलीअनुसार अघि बढ्ने बताए । शोक प्रस्ताव राख्दा पनि वेल घेराउ गरिरहनु शहीदप्रतिको अपमान भएको उनले जिकिर गरे ।
सरकारी बिजनेसमाथिको विरोध गर्नु जायज भएपनि शोक प्रस्ताव राख्दा समेत विरोध गर्नुले संसदको मर्यादा गिराएको उनको भनाइ थियो । अशोभनीय व्यवहार र प्रवृत्ति संसदमा देखिनु राम्रो नभएको उनले बताए ।
प्रमुख सचेतक बर्तौलाले संघीय निजामतीलगायतका महत्वपूर्ण विधेयकहरु आजको संसद बैठकबाट अघि बढाइने जानकारी दिए ।
