यामराज बिष्ट/मध्यान्ह
दैलेख : खाद्य व्यवस्था तथा व्यापार कम्पनी लिमिटेड शाखा कार्यालय दैलेखले सहुलियतको चामल दिएपछि स्थानीय खुशी भएका छन् । यसअघि चाडपर्वका बेला मात्र छुट दिँदै आएको खाद्य संस्थानले सरकारले निषेधाज्ञा अवधिभर चामलमा २० प्रतिशत छुट दिने घोषणा गरेपछि चामल लिनेको घुइँचो लागेको हो ।
कम्पनीले एक सातादेखि प्रतिकिलो २० प्रतिशत छुट दिएर चामल बिक्री गर्न थालेको छ । खाद्य संस्थानले छुटको चामल दिएपछि ज्याला मजदुरी गरेर जीविकोपार्जन गर्ने विपन्न समुदायलाई ठुलो राहत मिलेको स्थानीय बताउँछन् ।
सहुलियतको चामल लिन दैलेख सदरमुकाम नारायण नगरपालिका, नौमुले गाँउपालिका, भगवतीमाई गाँउपालिका, दुल्लु नगरपालिका, भैरवी गाँउपालिका महाबु गाँउपालिकाबाट मानिसहरु आउन थालेका छन् ।
बिहीबारसम्म दैलेखमा ९८.२० क्विन्टल चामल बिक्री भएको खाद्य व्यवस्था तथा व्यापार कम्पनी लिमिटेड दैलेखका शाखा प्रमुख रण बहादुर ऐरीले मध्यान्हलाई बताए ।
'कोरोना महामारीका बेला नागरिकलाई छुटले विशेष राहत मिलेको छ,' कार्यालय प्रमुख ऐरीले भने, 'निषेधाज्ञामा‘काम गर्न नपाएर मर्कामा परेका नागरिकले पछिल्लो समयमा धमाधम सहुलियतको चामल लिइरहेका छन् ।'
सोमवार, बुधबार, बिहीबार बिहान १० बजेदेखि ३ बजे सम्म मात्र चामल बिक्री गर्न थालिएको छ । खाद्य संस्थानले प्रति परिवार एक जनालाई सम्बन्धित व्यक्तिको नागरिकताको आधारमा २५ किलो चामल दिने गरेको छ ।
कम्पनीले २० प्रतिशत छुट हुनुअघि २५ किलोको स्टिम जिरा मसिनो चामल प्रतिबोरा १ हजार ६ सय ५० रुपैयाँमा बिक्री गरिरहेको थियो । अहिले १ हजार ३ सय २० रुपैयाँमा उक्त चामल बिक्री भइरहेको छ । त्यस्तै १ हजार ४ सय ७० पर्ने मध्यम चामल १ हजार १ सय ७६रुपैयाँमा बिक्री भइरहेको छ भने अरुवा मकवानपुर चामम यसअघि १ हजार ४ सय १० मा बिक्री हुने गरेको थियो भने अहिले १ हजार १ सय २८ रुपैयाँमा बिक्री भइरहेको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies