काठमाडौं : गीतकार प्रमिला वस्तीको सुन्दर शब्द रचना रहेको 'माया गर्छु भन्न पनि' बोलको म्युजिक भिडियो सार्वजनिक भएको छ । पेशाले मनोविद् रहेकी गीतकार प्रमिलाको उक्त गीत प्रेम भावमा सजिएको छ ।
गायिका रचना रिमालको स्वर रहेको गीतमा विश्वनाथ प्रेमको संगीत रहेको छ । किरण कँडेलको संगीत संयोजन रहेको गीतलाई चर्चित र व्यस्त निर्देशक कृण्णदेव रुपाखेतीले निर्देशन गरेका छन् । शम्भु तण्डुकारको मिक्सिङ मास्टरिङ रहेको गीतमा गरिमा शर्मा र प्रभात पाल ठकुरीले अभिनय गरेका छन् ।
गीतकार प्रमिलाको निर्माणमा तयार पारिएको गीतमा उत्सव दाहालको छायाँकन, राहुल बराइलीको कोरियोग्राफी र विकास ज्ञवालीको सम्पादन रहेको छ । ओएसआर डिजिटलबाट सार्वजनिक भएको गीतलाई दर्शक स्रोताहरुले एकदमै रुचाइरहेको गीतकार प्रमिला बताउँछिन् । गीत युवापुस्तालाई लक्षित गरी निर्माण गरिएको निर्देशक रुपाखेतीले बताए ।
समसामयिक विषयमा गीत लेख्न खप्पिस गीतकार प्रमिला गीत संगीत भनेको समाजको ऐना भएको बताउँछिन् । उनी भन्छिन्, 'गीत संगीतले हरेक क्षेत्रलाई प्रोत्साहन गरिरहेको हुन्छ । त्यसैले हामीले गीत संगीतलाई हल्कारुपमा लिनुहुँदैन । गीत संगीत मनोरञ्जनको साथसाथै समाजको ऐना पनि हो । मेरा गीतहरुमा दर्शक स्रोताहरुले ती सबै पाउनु हुन्छ । माया गर्छु भन्न पनि यस्तै रमाइलो र सबैलाई मनपर्ने गीत हो । छोटो समयमा दर्शक श्रोताहरुले गीतलाई मनपराइदिनु भएकोमा खुसी लागेको छ ।'
