रौतहट : बागमती नदीमा डुबेर बेपत्ता भएका बालकको शव फेला परेको छ । असार ३१ गते दिउँसो जिल्लाको गढिमाई नगरपालिका-३ लक्ष्मीपुर बस्ने हकुदिन कवाडीका छोरा १० वर्षीय सफर कवाडी बागमती नदीमा पौडी खेल्ने क्रममा डुबेर बेपत्ता भएका थिए ।

डुबेर बेपत्ता भएका बालकलाई खोज्न सशस्त्र प्रहरी बलको ३० जनाको उद्धार टोली, नेपाली सेना र नेपाल प्रहरीको संयुक्त टोलीले खोजी गरेको थियो । बिहीबार बिहान गढीमाई-७ धर्मपुरस्थित बेपत्ता भएको स्थानबाट दक्षिणतर्फ बागमती नदीको किनारमा बालकको शव फेला पारेको हो ।

ती बालकसँगै नदीमा डुबेका अर्का १३ वर्षीय सैदुला कवाडीलाई भने स्थानीयहरुले उद्धार गरेका थिए । उनको गरुडास्थित रोमा अस्पतालमा उपचार भइरहेको र अवस्था खतरामुक्त रहेको सशस्त्र प्रहरी बलका एसपी विक्रम हुमागाईंले जानकारी दिए ।