काठमाडौं : अमेरिका र युक्रेनले १९ बुँदे शान्ति सम्झौतामा हस्ताक्षर गर्ने सहमति गरेका छन् । अमेरिकी राष्ट्रपति डोनाल्ड ट्रम्पले २८ बुँदे शान्ति योजनामा केही संशोधन गरेका छन् । यसका लागि युक्रेन र अमेरिकाबीच हालै जेनेभामा छलफल भएको थियो, जहाँ १९ बुँदे मस्यौदा तयार पारिएको हो । 

ट्रम्प प्रशासनले युक्रेनसँग सल्लाह नगरी रूससँग मात्र परामर्श गरेर २८ बुँदे योजना तयार गरेको थियो, जसको विरोधपछि अमेरिक र युक्रेनी अधिकारीहरूले नयाँ मस्यौदा तयार गरेका हुन् । युक्रेनका उप–विदेश मन्त्री सर्गई किस्लित्स्याले फाइनान्सियल टाइम्ससँग भनेका छन् कि यो मस्यौदा युक्रेनका लागि स्वीकार्य छ, तर केही साना विवरणहरू अझै समाधान हुन बाँकी छन् । 

अमेरिकी अधिकारीहरूले राष्ट्रपति ट्रम्प र युक्रेनी राष्ट्रपति जेलेन्स्कीबीच युद्ध अन्त्य गर्न वार्ता गर्ने मिति निश्चित भएको बताएका छन् । यद्यपि, किवले यसबारे कुनै प्रतिक्रिया दिएको छैन, र ह्वाइट हाउसले पनि वार्ता पुष्टि गरेको छैन । 

यसैबीच, युद्ध जारी रहेको अवस्थामा, रूसी र युक्रेनी सेनाले एकअर्कामाथि हवाई आक्रमण गरेका छन्, जसमा किव र रोस्तोभ क्षेत्रमा मृत्यु भएको छ । युक्रेनी सुरक्षा प्रमुख रुस्तेम उमेरोभले भनेका छन् कि यो महिनामै सम्झौता अन्तिम चरणमा पुर्‍याउन राष्ट्रपति जेलेन्स्कीको अमेरिका भ्रमण अपेक्षित छ । 

युक्रेनका युरोपेली सहयोगीहरूले यस योजनाको आलोचना गरेका छन्, यद्यपि राष्ट्रपति जेलेन्स्कीले त्यसमा गरिएको संशोधनलाई स्वागत गरेका छन् ।