काठमाडौं : परराष्ट्रमन्त्री शिशिर खनालले विदेशमा रहेका नेपाली नागरिकले भोग्दै आएका समस्या समाधानलाई मन्त्रालयले उच्च प्राथमिकतामा राखेको बताएका छन् ।
हाल विभिन्न देशमा नेपाली राजदूतको नियुक्ति नहुँदा द्विपक्षीय कूटनीतिकसहित श्रम कूटनीतिका काम प्रभावित भएका छन् । सिंहदरबारमा बुधबार सञ्चारकर्मीसँग कुराकानी गर्दै मन्त्री खनालले नेपाली दूतावासमा राजदूत नियुक्तिका लागि प्राप्त सिफारिस तथा आवेदनमाथि आवश्यक छलफल गरी निष्कर्षमा पुग्ने चरणमा रहेको बताए ।
मन्त्री खनालले विदेशस्थित नेपाली नागरिकलाई आवश्यक सहयोग र सहजीकरण उपलब्ध गराउन मन्त्रालयको उपलब्ध स्रोत, साधन र क्षमताअनुसार निरन्तर काम भइरहेको जानकारी दिए ।
रिक्त कूटनीतिक पदमा नियुक्ति प्रक्रिया अघि बढ्नुका साथै विदेशमा रहेका नेपाली नागरिकको संरक्षण तथा द्विपक्षीय सम्बन्ध सुदृढीकरणलाई समानान्तर रूपमा अघि बढाइएको मन्त्री खनालको भनाइ छ ।
वैदेशिक रोजगारीमा रहेका नेपालीहरूको ठुलो संख्याले नेपाली कूटनीतिक नियोगहरूको अक्षमताका कारण सहज रूपमा सेवा पाउन नसकेको गुनासो गरिरहेका छन् ।
.jpg)
