काठमाडौं : पूर्वी नेपालको भ्रमणमा रहेका पूर्वप्रधानमन्त्री पुष्पकमल दाहाल प्रचण्डले आगामी आमचुनावसम्म नेकपा माओवादी केन्द्रलाई नयाँ ठाउँमा पु¥याउने बताएका छन् । मोरङमा शनिबार आयोजित एक कार्यक्रमलाई सम्बोधन गर्दै माओवादी अध्यक्ष प्रचण्डले आगामी चुनावबाट पार्टी शक्तिशाली बन्ने विश्वास लिएका हुन् ।
‘मलाई विश्वास र भरोषा छ कि आउने चुनावमा जनताले माओवादीलाई फेरि सरकारको नेतृत्व गर्ने हैसियत दिनेछन्, नयाँ ठाउँमा पु¥याउनेछन्’, प्रचण्डले भने । माओवादीलाई सरकारमा लैजादा मात्र जनताले चाहेको परिवर्तन संभव रहेको उनले बताए ।
माओवादीलाई नयाँ ठाउँमा लैजाने र सरकारको नेतृत्व गर्न सक्ने हैसियत आफ्नै नेतृत्वमा दिलाउने पनि प्रचण्डले बताए । ‘जीवनको उत्तरार्धमा छु, किन हो अलि बढी जोस् आउन थालेको छ’ उनले भने, ‘मलाई जोस् आएकै छ ।’
उनी यतिमै रोकिएनन् । आफ्नो नेतृत्वको प्रशंग बढाएर प्रचण्डले मरेपछिको परिकल्पनासम्म गरेका छन् । मरेपछि पनि नेतृत्व गर्ने संकल्प उनले सुनाएका छन् ।
‘भनिन्छ, एउटा अशल राजनीतिज्ञ बाचिञ्जेल जनताको सेवा गर्छन्, मरेपछि पनि आफ्नो कर्मले सयौ वर्ष जनताको सेवा गरिराख्छन्, राजनीतिज्ञ कहिल्यै मर्दैनन्’ उनले भने, ‘मैले कहिल्यै नमर्ने राजनीतिज्ञ बन्ने संकल्प लिएको छु ।’
प्रचण्डको यस्तो अभिव्यक्तिलाई अर्थपूर्ण रुपमा लिन सकिन्छ । किनकि उपमहासचिव जनार्दन शर्माले नेतृत्व हस्तान्तरणको अडान लिएका छन् । पार्टीभित्र बलियो प्रभाव राख्ने शर्माले प्रचण्डलाई तीन वटा सुझाव दिएका छन् । तर ती सबै नेतृत्व हस्तान्तरणसँगै सम्बन्धित छन् ।
शर्माले दिएको विकल्प अनुसार नेतृत्व छोडेर आफूले चाहेको व्यक्तिलाई अगाडि बढाउन प्रचण्डसँग आग्रह गरेका छन् । त्यसो गर्दा प्रचण्डले चाहेकै व्यक्तिले माओवादीको नेतृत्व गर्नेछन् । दोस्रो विकल्पमा प्रचण्ड सहित अहिलेका सबै पदाधिकारीले विश्राम लिनुपर्नेछ । पार्टीको नेतृत्व भने तेस्रो पुस्ताका नेताले गर्नेछन् ।
तेस्रो विकल्पमा शर्माले प्रचण्डलाई महाधिवेशनबाट भिडेर नेतृत्वमा आउन सक्ने विकल्प पनि दिएका छन् । तर अहिलेकै जस्तो अवस्थामा नेतृत्वमा रहिरहन नसक्ने चुनौती शर्माले दिएका छन् ।
जवाफमा प्रचण्डले भने शर्माले पार्टी फुटाउन खोजेको प्रचार गरेका छन् । आफैले अब जनार्दन शर्माले पार्टी फुटाउँदैनन् भन्ने निष्कर्ष सुनाइरहेका छन् । शर्माले पार्टी फुटाउँदैनन् भन्ने निष्कर्षदेखि सयौं वर्षसम्म बाँच्ने बअभिव्यक्तिबाट प्रचण्डले नेतृत्व परिवर्तन संभव नरहेको सन्देश दिएको अनुमान गर्न सकिन्छ ।
अझ पदाधिकारी, स्थायी कमिटी बैठकपछि सिंधै प्रदेश तहको छलफल राखेर प्रचण्डले आफ्नो पक्षमा माहोल बनाउन चाहेका छन् । किनकि केन्द्रीय समिति बैठक राख्नु अगाडि केन्द्रीय सदस्यहरुसँग अलगअलग छलफल गर्दा सबैलाई प्रचण्डले बुझ्न र बुझाउन सक्ने भए ।
