दोहा, कतार : नेपाली लोक तथा दोहोरी गीतलाई फोहोरी बनाउने र छाडा गीत गाउनेलाई नैतिकबाहेकको कुनै कारबाही गर्ने अधिकार राष्ट्रिय लोक तथा दोहोरी गीत प्रतिष्ठान नेपालसँग नरहेको प्रतिष्ठानका उपाध्यक्ष तथा गायक रमेशराज भट्टराईले बताएका छन् । प्रतिष्ठान कतार शाखाले आयोजना गरेको सम्मान तथा भेटघाट कार्यक्रममा उपाध्यक्ष भट्टराईले उक्त कुरा बताएका हुन् । उनले भौतिक या कानूनी कारबाही गर्ने अधिकार आफूहरूसँग नरहेको बताउँदै त्यो अधिकार प्राप्तिका लागि प्रतिष्ठान सरोकारवाला निकायसँग लडिरहेको बताए ।
प्रतिष्ठान मातहत रहेको विकृति विसंगति न्यूनीकरण विभागले केही काम गर्नेबित्तिकै आलोचना गर्ने र नगर्दा पनि आलोचना गर्नेहरूप्रति लक्षित गर्दै भट्टराईले लोक तथा दोहोरी गीतलाई यसको मर्म र धर्ममा राख्ने सबै लोकप्रेमीहरुको पहिलो दायित्व रहेको बताए । कार्यक्रमका प्रमुख अतिथि समेत रहेका भट्टराईले लोक तथा दोहोरी गीतमा सेन्सर बोर्डको आवश्यकता औंल्याउँदै सरोकारवालासँग प्रतिष्ठानको अधिकारको लडाइँमा सबैले रचनात्मक सहयोग गर्न पनि आग्रह गरे । पाँचौं पटक सांगीतिक प्रस्तुति दिन कतार आएका भट्टराईलाई प्रतिष्ठान कतार शाखाले दोसल्ला ओढाएर मायाको चिनोसहित सम्मान पत्रले सम्मान गरेको थियो ।
प्रतिष्ठान कतार शाखाका अध्यक्ष शिवराम ढकालको सभापतित्वमा सम्पन्न कार्यक्रममार्फत पर्वत समाज कतार बहुउद्देश्यीय अक्षयकोषको प्रथम अधिवेशन तथा विविध सांस्कृतिक कार्यक्रममा सांगीतिक प्रस्तुति दिन कतार आएकी सर्जक तथा लोक दोहोरी गायिका प्रतिभा शर्मा चपाइ सम्मानित भएकी छिन् । त्यस्तै रोज हेल्पिङ ह्यान्डसले आयोजना गरेको तिज विशेष कार्यक्रममा आफ्ना प्रस्तुति दिन कतार आएका डाइरेक्टर/कोरियोग्राफर प्रदीप कुमार रसाइली र मोडल तथा नृत्यांगना रिया विश्वकर्मा पनि सोही कार्यक्रममा सम्मानित भएकी छन् ।
शनिबार साँझ प्लाजा मलमा रहेको सम्सरा थकाली रेस्टुरेन्टमा सम्पन्न कार्यक्रममा प्रतिष्ठान कतार शाखाका प्रथम उपाध्यक्ष कृष्ण ढकालले स्वागत मन्तव्य राखेका थिए भने सचिव कृष्ण दर्लामीले सहजीकरण गरेका थिए । कार्यक्रममा प्रतिष्ठान कतार शाखाका संस्थापक अध्यक्ष कृष्ण बराल तथा पदेन सल्लाहकारहरूसहित करिब तीन दर्जन कलाकारहरुको उपस्थिति थियो भने उनीहरुले शुभकामना मन्तव्य पनि राखेका थिए ।
वक्ताहरूले पछिल्लो समय लोक गीत संगीतमा देखिएको विकृतिका बारेमा चिन्ता व्यक्त गरेका थिए । कार्यक्रमको समापन गर्दै सभापति ढकालले संस्था स्थापनादेखि हालसम्म भोग्नु परेका कठिनाइलाई स्मरण गरे । ढकालले आफ्नै कार्यकालमा केन्द्रीय अध्यक्षसहित केन्द्रीय उपाध्यक्षलाई सम्मान गर्ने अवसर पाएकोमा खुसी व्यक्त गरे ।
