हुम्ला : पेट्रोल र डिजेलको मूल्य घटेपनि हुम्लामा यातायात साधनको भाडा भने घट्दैन । हिमाली जिल्ला हुम्लामा सञ्चालन हुँदै आएका यातायातका साधनहरुका लागि इन्धनको मूल्य घटेको लामो समय हुँदा पनि यात्रुहरु पुरानै बढेको भाडादर तिर्न बाध्य छन् ।
जिल्लाका पाँच वटा गाउँपालिका राष्ट्रिय सडक मार्गमा आंशिक रुपमा जोडिएसँगै इन्धनको मूल्य घटेको छ, तर आन्तरिक रुटमा छोटा तथा लामा दुरीमा सञ्चालन हुने यातायातको भाडा भने घटाउने स्थानीय सरकार र जिल्ला प्रशासन कार्यालयको कुनै सुरसार छैन ।
मध्यान्हसँग कुरा गर्दै एक सवारी चालकले भने, ‘डिजेलको मूल्य घटेको छ, तर भाडा छोटा दुरीदेखि लामो दुरीसम्म करिब ५ सयदेखि ५ हजारसम्म हुँदा पनि गाडी साहुले भाडा भने घटाका छैनन् ।’
भाडा नघट्दा यात्रु पाउन मुस्किल हुन्छ, यात्रु पाएपनि बिना दर्ताका पठाओले सस्तोमा यात्रु ओसार्दा गाडीले यात्रु पाएका छैनन् ।
अहिले बजारमा डिजेलको मूल्य प्रतिलिटर २ सय ८ पर्दछ, भने पेट्रोल प्रति लिटर २ सय ५० रुपैयाँ पर्दछ । करिब डेढ वर्ष अगाडि डिजेलको प्रति लिटर ३ सय र पेट्रोलको प्रति लिटर ४ सय हँुदा कार्यान्वयन गरिएको भाडादर अहिले पनि पुरानै भाडा कायम गरिएको देखिएको छ ।
जिल्ला सदरमुकाम सिमकोटमा आन्तरिक सडकमा सञ्चालन हुने बोलेरो जिप करिब ३० वटाको हाराहारीमा छन् । जति बढी सवारी साधन भयो, त्यतिनै प्रतिस्पर्धामा भाडा कम हुनुपर्ने भएपनि पुरानै भाडामा यात्रु सवार गर्दै आएका छन् । यातायातको भाडा दर महंगो हुँदा न्यून आयस्रोत भएका नागरिकले गाडी हेर्नू बाहेक यात्रा गर्ने अवस्था नभएको देखिन्छ । हुम्लाको खर्पुनाथ, सर्केगाड,चंखेली,अदानचुली र ताजाकोट राष्ट्रिय सडक मार्गमा आंशिक रुपमा जोडिएका छन् । डिजेल र पेट्रोल सदरमुकामदेखि एक घण्टाको पैदल यात्रा लाग्ने खार्पुनाथमा ट्रकमा ल्याइन्छ ।
विगतका वर्षमा सर्केगाडाको सलिसलाहबाट खच्चडमा बोकाएर इन्धन ल्याइन्थ्यो । मूल्य भने पुरानै कायम छ । सिमकोट र नाम्खा गाउँपालिका नेपाल र चीनको सीमाना सिल्सासम्म यातायात सञ्चालन हुँदै आएका छन् । सदरमुकाम सिमकोटको मात्र सवारी भाडा नभएर जिल्ला भरिकै निर्धारण गरिएको छैन् । इन्धनको मूल्य अनुसारको यातायात भाडादर पनि कायम गर्नु जरुरी देखिएको छ । यसमा सरोकारवाला निकायले समयमै ध्यान दिन जरुरी देखिन्छ ।
